Yaşıllıqların salınması və bitkilərə aqrotexniki xidmətlərin göstərilməsini QSC-nin Torpaqların  Rekultivasiyası Departamenti (TRD) və İnzibati təsərrüfat şöbəsi (İTŞ) həyata keçirir. Təcrübəli mütəxəssislərinin və bağbanların fəaliyyəti nəticəsində əvvəlki illərdə olduğu kimi, bu il də istehsalat sahələrindəki  ağac və bəzək kollarının sayı xeyli dərəcədə artırılmışdır. Yaşıllıqlar müasir suvarma sistemləri ilə təchiz olunmuş, mövsümü aqrotexniki xidmətlər göstərilmişdir.  Bağbanların gərgin əməyi sayəsində, isti yay günlərində suvarma işlərinin müntəzəm aparılması və yaşıllıqlara vaxtlı-vaxtında  aqrotexniki qulluq göstərilməsi nəticəsində istehsalat sahələri   yaşıllıqlara bürünmüşdür. QSC-nin xidmət sahələrində texnoloji proseslərinin təkmilləşdirilməsi və yeni texnologiyaların tətbiqi də atmosferə atılan zərərli tullantıların miqdarının azalmasına və  yaşıllıqların yaxşı  inkişaf etməsinə  öz  müsbət təsirini göstərmişdir.
     Hazırda  “Ekol Mühəndislik Xidmətləri” QSC-nin TRD və İTŞ-nin əməkçiləri mütəxəssisləri  ARDNŞ-nin  Qaz Emalı Zavodunun  istehsalat  sahəsində, "Azneft" İB-nin  “Bibiheybətneft”, “Abşeronneft” və   Z.Tağıyev adına NQÇİ-nin  mədən ərazilərində, eləcə də QSC-nin Heydər Əliyev adına BNEZ-nun ərazisindəki xidmət sahəsində və TRD-nin Zığ şosesindəki inzibati binasının ərazisində 100 minə qədər müxtəlif  növ ağac, bəzək  və gül kollarına yüksək səviyyədə aqrotexniki xidmətlər göstərirlər. Yaşıllıqların suvarılmasında  əsasən mexaniki üsullardan geniş istifadə olunur ki,  bu da öz səmərəli nəticələrini  verməkdədir.
   Ekoloji vəziyyətin yaxşılaşdırılmasında və insan sağlamlığının qorunmasında yaşıllıqların roluna böyük önəm verən "Ekol Mühəndislik Xidmətləri" QSC,  bu sahəni fəaliyyətinin əsas tərkib hissəsi kimi qəbul edərək bundan sonra da bütün zəruri tədbirlərin həyata keçirilməsini nəzərdə tutur.