İyunun 13-də “ Ekol Mühəndislik Xidmətləri ” QSC-nin xidmət sahələrində Milli Qurtuluş Günü ilə əlaqədar tədbir keçirilmişdir. Tədbirdə çıxış edənlər qeyd etmişlər ki, 90-cı illərdə Azərbaycan xalqı və dövlətçiliyimiz ən çətin və təhlükəli bir dövrünü yaşayırdı. Yeni Azərbaycan uğrunda qurtuluş hərəkat genişlənirdi. 1992-ci il oktyabrın 16-da Azərbaycanın 91 nəfər nüfuzlu ziyalısı “Səs” qəzeti vasitəsi ilə müraciət edərək, Heydər Əliyevdən Qurtuluş hərəkatına rəhbərlik etməsini təkidlə xahiş etdilər.
AXC-Müsavat iqtidarı uzun müddət öz yarıtmaz fəaliyyəti ilə ölkəni parçalanmaq həddinə çatdırmış, vətəndaş müharibəsi üçün zəmin yaranmışdır. Başlanmış bu təhlükəli proseslərin qarşısını ala bilmədiyini dərk edən iqtidar da son anda kömək üçün Heydər Əliyevə müraciət etdi. Azərbaycanın görkəmli oğlu, böyük vətənpərvər Heydər Əliyev respublikanın bu ağır günündə xalqın və hakim dairələrinin təkidli dəvətini qəbul edərək iyunun 9-da Bakıya gəldi. Bütün Azərbaycan xalqı bu gəlişi böyük ümid və sevinclə qarşıladı. Bununla da daxili və xarici düşmənlərimizin bütün planları iflasa uğradı. Xilaskarlıq missiyasını öz üzərinə götürən bu nəhəng şəxsiyyət, həyatını təhlükə altında qoyaraq vətəndaş qarşıdurmasının genişlənməsinin qarşısını aldı. 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Bu gün tariximizə Milli Qurtuluş Günü kimi daxil oldu. Xalqın tələbi ilə Milli Məclis 1997-ci ilin iyununda bu günü bayram elan etdi və hər il bu bayrama təntənə ilə qeyd olunur. Çıxışlarda xüsusilə vurğulanmışdır ki, Heydər Əliyevin xalqımızın və tariximizin qarşısındakı ən böyük xidmətləri, kəskin geosiyasi ziddiyyətlərin mövcud olduğu bir şəraitdə Azərbaycan dövlətçiliyini xilas etməkdən, Azərbaycanın varlığının parçalanıb yox olmaq təhlükəsindən qurtarmaqdan ibarətdir. Dövlətçiliyimizin qorunub saxlanılması isə azadlığımızın və müstəqilliyimizin qorunub saxlanması deməkdir, qurtuluş deməkdir! Azərbaycan dövləti ona qarşı yönəlmiş qəsdlərdən uğurla çıxdı. Ümummilli liderin qətiyyəti xalqa ruh yüksəkliyi gətirdi, inamımızı özümüzə qaytardı, sabitlik və əmin-amanlıq yaratdı. Ümummilli liderimiz Heydər Əliyevin Azərbaycana rəhbərlik etdiyi dövrdə milli-mənəvi dəyərlərimiz bərpa edilmiş, onun qətiyyəti, apardığı uğurlu daxili və xarici siyasət sayəsində ölkəmiz xaosdan xilas olmuş, sivil demokratik inkişaf yolu ilə inamla irəliləyərək böyük nailiyyətlər qazanmışdır. Heydər Əliyev öz gücünə, təcrübəsinə güvənən dahi siyasətçi kimi dəfələrlə söylədiyi məşhur kəlamına sadiq qalaraq sübut etdi ki, “Azərbaycanın dövlət müstəqilliyi əbədidir, sarsılmazdır, dönməzdir”. Ulu öndərin siyasi kursunun layiqli davamçısı, Azərbaycan Respublikasının Prezidenti İlham Əliyev cənablarının həyata keçirdiyi uğurlu siyasətin nəticəsi olaraq, bu gün respublikamız müstəqillik yolunda mətin addımlarla irəliləyir və qazandığı uğurlarla qüdrətli, aparıcı bir dövlətə çevrilir. Tədbirin sonunda həmin illərin tarixi anlarını əks etdirən videoçarx nümayiş olunmuş, iştirakçılar ulu öndərin əziz xatirəsini bir dəqiqəlik sükutla yad etmişlər.
tarix : 13.06.2014
|