İyunun 14-də Azərbaycanda fotoqrafiyanın yaranmasının 175 illiyi və Azərbaycan Fotoqraflar Birliyinin (AFB) 15 illiyi ilə əlaqədar , İçəri Şəhərdə yerləşən Müasir İncəsənət Mərkəzində fotoqraf Könül Süleymanovanın "Onlar" adlı fərdi foto sərgisi keçirilmişdir. Sərgi əsasən müasir Azərbaycan Fotoqrafiyası tarixində öz sözünü demiş və deməkdə olan peşəkar fotoqrafların portretlərini ictimaiyyətə nümayiş etdirmək məqsədi ilə təşkil edilmişdir.
Foto sərgidə nümayiş etdirilən 50-dək foto portretlər arasında respublikamızın tanınmış fotoqrafları, Fərid Məmmədov, Sənan Ələsgərov, Ənvər Qaragözov, Vüqar İbadov, Rüfət Abas, Rauf Umud, Adil Novruzov və digər məşhur fotoqrafların foto portretləri də nümayiş etdirilmişdir. Sərgi Ziyarətçilər tərəfindən maraqla izlənilmişdir.
Sərginin açılışındı iştirak edən AFB-nin sədri Mirnaib Həsənoğlu, sədr müavini Rauf Umud və digərləri Könül Süleymanovanın yaradıcılığından danışmış, gənc olmasına baxmayaraq onun potensial imkanlı bir fotoqraf kimi yetişməkdə olduğunu xüsusilə vurğulamışlar. Qeyd olunmuşdur ki, bu sərgi 3 ildən artıqdır ki, AFB-nin üzvü olan Könül Süleymanovanın ikinci fərdi sərgisidir. Bundan əvvəl, 2012-ci ildə keçirilən sərgi Azərbaycan Teatr və Kino sahəsində iz qoymuş sənətçilərə ithaf edilmiş və sərgi ictimaiyyət tərəfindən böyük maraqla qarşılanmışdır. Könül Süleymanovanın "Onlar" adlı fotolayihəsi bu ildən etibarən ənənəvi olaraq hər il keçirilməsi nəzərdə tutulmuşdur.
Qeyd edək ki, Könül Süleymanova 2013-cü ildən başlayaraq 2 ildən artıq bir müddətdir ki, "Ekol Mühəndislik Xidmətləri" QSC-də fotoqraf vəzifəsində çalışır. Bu illərdə Respublika
əhəmiyyətli və beynəlxalq sərgilərdə QSC-nin fəaliyyətini əks etdirən stendlərdə Könülün onlarla dəyərli fotoları öz əksini tapmışdır.
"Ekol Mühəndislik Xidmətləri" QSC-nin kollektivi Könül Süleymanovanı keçirdiyi uğurlu sərgi münasibəti ilə təbrik edir və ona gələcək fəaliyyətində müvəffəqiyyətlər arzulayır.