İyulun 25-də "Ekol Mühəndislik Xidmətləri" QSC-nin baş ofisində Finlandiyanın LAMOR şirkətinin prezidenti Fred Larsen, vitse-prezidenti Rasmus Guldbrand, müşaviri Matthew Bryza, MDB və Orta Şərq Ölkələri üzrə nümayəndəsi Hakan Ferhatoğlu ilə görüş keçirilmişdir.
Görüşdə "Ekol Mühəndislik Xidmətləri" QSC-nin baş direktoru Ramil Əliyev, baş direktorun istehsalat üzrə müavini-Texniki direktor Məzahir Hüseynov, SƏTƏM üzrə müavini Rəşad İsmayılov, eləcə də QSC-nin əlaqədar departament və şöbə rəisləri iştirak etmişlər. QSC-nin baş direktoru Ramil Əliyev iştirakçıları salamlayaraq, "Ekol Mühəndislik Xidmətləri" QSC barədə qisa məlumat verdi. Sonra söz qonaqlara təqdim olundu. Fred Larsen səmimi qəbula və görüşün keçirilməsi üçün yaradılan əlverişli şəraitə görə QSC rəhbərliyinə öz minnətdarlığını bildirdi. O qeyd etdi ki, təmsil etdikləri şirkət ətraf mühit problemlərinin həlli üzrə fəaliyyət göstərir. Əsas fəaliyyətləri neft dağılmalarının qarşısının alınması, neftlə çirklənmiş torpaqların təmizlənməsi, neftşlamın utilizasiyası, həmçinin sənaye sahəsində fəaliyyət göstərən zavod qurğu və avadanlıqların gücləndirilməsi və istehsalının artırılmasından ibarətdir. Belə ki, şirkətin fəaliyyət prinsipinin ən əsas olaraq neft sızmaları və axıntılarının qarşısının alınması sferasında bütün aspektləri özündə birləşdirən fəaliyyət yəni, araşdırma, mühəndislik, istehsal, çatdırılma, təlimlər, əməliyyatın aparılması və s. kimi tədbirlərin olmasını qeyd etdi. Həmçinin 20 ildən yuxarı fəaliyyət göstərən LAMOR şirkətin Meksika körfəzində baş verən iri miqyaslı neft sızmalarının qarşısının alınması zamanı istifadə olunan qurğu və avadanlıqların 70%-i məhz onların şirkəti tərəfindən təqdim olunduğunu vurğuladı. Əlavə olaraq, dünyanın 90 ölkəsində əsasən də ABŞ-da geniş tipli layihələri həyata keçirdiklərini qeyd etdi. Şirkət B.Ə.Ə, Orta Asiya, Küveyt, Oman və Azərbaycanda nümayəndəlik yaratmaq niyyətində olduqlarını bildirdi. Həmçinin şirkət Türkiyədə neft sızmalarının qarşısının alınması üzrə baş plan hazirladığını vurğuladı. Daha sonra ikitərəfli müzakirələr aparıldı, təcrübə layihələr, hal-hazırkı ekoloji durum və aparılan işlər, gələcək planlar barədə qarşılıqlı məlumat verildi və qərara alındı ki, bu ikitərəfli əməkdaşlıq əlaqələrinin yaradılması üçün qarşılıqlı səylər göstərilsin. Bununla da görüş qarşılıqlı anlaşma və işgüzar şəraitdə başa çatdı.
tarix : 25.07.2014
|