Respublikamızda ekoloji vəziyyətin yaxşılaşdırılmasına dair dövlət proqramı çərçivəsində ARDNŞ-nin fəaliyyət sahələrində həyata keçirilən kompleks tədbirlər sırasında neft emalı zavodlarında tullantıların idarə olunması və ətraf mühitə atılan zərərli maddələrin miqdarının azaldılması istiqamətində görülən işlər xüsusi önəm daşıyır.
ARDNŞ-nin potensial podratçısı qismində fəaliyyət göstərən "Ekol Mühəndislik Xidmətləri" QSC neft emalı zavodlarında texnoloji proseslər nəticəsində formalaşan sənaye-çirkab axıntı sularının təmizlənməsi, neftşlamın emalı və zərərsizləşdirilməsi layihələrinin icrasını uğurla yerinə yetirir.
QSC-nin Tullantıların Emalı Departamenti (TED) ARDNŞ-nin Heydər Əliyev adına BNEZ-nun və "Azərneftyağ" NEZ-nun istehsalat sahələrindən QSC-nin xidmət sahələrindəki təmizləyici qurğulara daxil olan tullantıların təmizlənməsini və zərərsizləşdirilməsini texnoloji reqlamentə uyğun olaraq yerinə yetirir. Eyni zamanda QSC-nin xidmət sahələrindəki mövcud mexaniki təmizləyici qurğuların məhsuldarlığını artırmaqla yanaşı, yeni texnika və texnologiyaların istehsalata tətbiqi istiqamətində də zəruri tədbirlər həyata keçirilir. Hazırda xidmət sahələrində istismar olunan İsveçrənin "Alfa-Laval" şirkətinin modul dekantor, "FOX-15" və İtaliyanın "Pieralisi" şirkətinin modul trikantor qurğuları öz müsbət nəticələrini verməkdədir.
Xidmət sahələrində istismarda olan qurğuların saz vəziyyətdə işləməsi, texnoloji proseslərin keyfiyyətinin yaxşılaşdırılması və ətraf mühitə mənfi təsirlərin qarşısının alınması məqsədilə, TED-nin kollektivi tərəfindən mütəmadi olaraq profilaktiki təmir işləri aparılır və texniki xidmətlər göstərilir.
"Ekol Mühəndislik Xidmətləri" QSC neft emalı zavodlarında ekoloji vəziyyətin yaxşılaşdırılması məqsədilə, göstərilən xidmətlərin keyfiyyətinin daha da artırılması, ətraf mühitə atılan tullantıların miqdarının azaldılması və yeni texnologiyaların tətbiqi sahəsində tədbirlərini davam etdirir.
tarix : 14.10.2014
|