Noyabrın 07-də "Ekol Mühəndislik Xidmətləri" QSC- nin xidmət sahələrində 9 noyabr-Dövlət Bayrağı günü ilə əlaqədar tədbirlər keçirilmişdir. Tədbirlərdə çıxış edənlər qeyd etmişlər ki, Azərbaycan Respublikasının Dövlət bayrağı 1918-ci il noyabrın 9-da Azərbaycan Xalq Cümhuriyyəti Hökumətinin iclasında qəbul edilmiş və 1920-ci ilin aprel ayınadək dövlət statusuna malik olmuşdur.
Həmin bayraq 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı olaraq təsdiq edilmişdir. 1991-ci il fevralın 5-də Azərbaycan Respublikasının Ali Soveti “ Azərbaycan Respublikasının Dövlət bayrağı haqqında ” Qanun qəbul edərək onu Dövlət bayrağı elan etmişdir. 1991-ci il oktyabrın 18-də “ Azərbaycan Respublikasının dövlət müstəqilliyi haqqında ” Konstitusiya Aktı ilə Azərbaycan Respublikası Azərbaycan Xalq Cümhuriyyətinin varisi kimi onun dövlət rəmzlərini, o cümlədən Dövlət bayrağını bərpa etmişdir. Prezident İlham Əliyev 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu il noyabrın 17-də isə Dövlət Bayrağı Gününün təsis edilməsi haqqında sərəncamlar imzalamışdır. Həmin ildən etibarən hər il noyabrın 9-u respublikamızda Dövlət Bayrağı günü kimi qeyd olunur. Natiqlər müstəqil respublikamızın əsas dövlət atributlarından olan milli bayrağımızın yaranma tarixindən, onun rəmzlərindən və müqəddəsliyindən danışmış, kollektivin bütün üzvlərini bu bayram münasibətilə təbrik etmişlər. Qeyd olunmuşdur ki, milli şərəfimizin simvolu olan bayrağımızı daima uca tutmaq, gənc nəsildə bayrağımızın şərəf və ləyaqətini qorumaq, məhəbbət hissi aşılamaq hər bir vətəndaşın borcudur. Tədbir iştirakçıları əminliklə vurğulamışlar ki, Respublika Prezidenti İlham Əliyev cənablarının apardığı məqsədyönlü tədbirlər nəticəsində tezliklə doğma ərazilərimiz işğaldan azad olunacaq və üçrəngli bayrağımız Qarabağ torpaqlarında əzmlə dalğalanacaqdır. Sonda tədbir iştirakçılarına Dövlət Bayrağı günü haqqında video çarx nümayiş etdirilimişdir.
tarix : 07.11.2014
|