Noyabrın 19-da "Ekol Mühəndislik Xidmətləri" QSC-nin baş ofisində Fransanın VEOLIA şirkətinin neft və qaz üzrə icraçı vitse-prezidenti Thierry Froment, biznesin inkişafı üzrə meneceri Mert Enver Çerpeş, Orta Asiya və Qafqaz üzrə suların hazırlanması, təmizlənməsi və şirinləşdirilməsi qurğularının kommersiya direktoru Olivier Clausin ilə görüş keçirilmişdir. Görüşdə QSC-nin baş direktorunun istehsalat üzrə müavini-Texniki direktor Məzahir Hüseynov, eləcə də əlaqədar departament və şöbə rəisləri iştirak etmişlər.
Məzahir Hüseynov fransalı qonaqları səmimi salamlayaraq, QSC-nin fəaliyyəti haqqında onlara qısa məlumat vermişdir. O, bu görüşdə çirkab və lay sularının təmizlənməsi sahəsində yeni texnika və texnologiyalar haqqında maraqlı məlumatlar əldə ediləcəyinə və əməkdaşlıq əlaqələri üçün zəmin yaranacağına əminliyini bildirmişdir. Sonra söz qonaqlara təqdim olunmuşdur. Thierry Froment səmimi qəbula və görüşün keçirilməsi üçün yaradılan əlverişli şəraitə görə QSC rəhbərliyinə öz minnətdarlığını bildirmişdir. Sonra Olivier Clausin təmsil etdikləri VEOLIA şirkətinin fəaliyyəti haqqında məlumatı və texnoloji prosesləri əks etdirən video materialları görüş iştirakçılarına təqdim etmişdir. O, bildirmişdir ki, VEOLIA şirkəti 1853-cü ildə yaradılıb və dünyanın 66 ölkəsində fəaliyyət göstərir. Şirkət əsasən dünyada mövcud olan texnologiyalardan və kompleks qurğulardan istifadə etməklə, zəruri su ehtiyatlarının hazırlanması, sənaye-çirkab, lay, məişət fekal suların təmizlənərək yararlı hala gətirilməsi və dəniz suyunun şirinləşdirilməsi üzrə ixtisaslaşmışdır. Olivier Clausin su təmizləyici və şirinləşdirici zavodlar, qurğular və texnologiyalar haqqındakı video materialları görüş iştirakçılarına nümayiş etdirmiş və əsas texnoloji prinsipləri onlara izah etmişdir. Sonra mövzu ətrafında geniş müzakirələr aparılmış və bir sıra məsələlərə aydınlıq gətirilmişdir. Qeyd olunmuşdur ki, VEOLIA şirkəti bu sahədə dünyanın bir çox ölkələrində uğurlu layihələr həyata keçirmişdir. Thierry Froment Azərbaycanda neft-kimya sənayesi sahələrində sənaye-çirkab, lay və məişət fekal suların təmizlənməsi sahəsində layihələr həyata keçirməkdə və bu sahədə "Ekol Mühəndislik Xidmətləri" QSC ilə etibarlı bir partnyor kimi əməkdaşlıq etməkdə maraqlı olduqlarını bildirmişdir. Sonda Məzahir Hüseynov maraqlı məlumatlara və təklifə görə fransalı qonaqlara öz təşəkkürünü bildirmişdir. Qərara alınmışdır ki, şirkətlər ikitərəfli qaydada öz fəaliyyət sahələri ilə yaxından tanış olub, həyata keçiriləcək layihələr barədə konkret təkliflər təqdim etsinlər. Eləcə də tərəflər gələcək əməkdaşlıq əlaqələrinin qurulması istiqamətində qarşılıqlı səylərini artırsınlar. Bununla da görüş qarşılıqlı anlaşma və işgüzar şəraitdə başa çatmışdır.
tarix : 20.11.2014
|