Neft sənayesi sahələrində neftlə çirklənmiş torpaqların təmizlənməsi, reabilitasiya olunmuş ərazilərdə yaşıllıqların salınması, bitkilərə aqrotexniki xidmətlərin göstərilməsi və landşaftın bərpası layihələrini icra edən "Ekol Mühəndislik Xidmətləri" QSC-nin Torpaqların Rekultivasiyası Departamenti (TRD) 2014-cü ildə də məqsədyönlü fəaliyyət göstərmiş və "Sifarişçi" təşkilatların müqavilə öhdəliklərinə layiqincə əməl etmişdir.
Ötən il ərzində TRD tərəfindən "Azərneftyağ" NEZ-nun "Bakı Ağ Şəhər" layihəsi ərazisində yerləşən istehsalat sahələrindən 662 min 398 m3 neftlə çirklənmiş torpaqların daşınması təmin edilmişdir. İl ərzində TRD-nin 1-ci və 3-cü sahələrinin əməkçiləri ARDNŞ-nin Qaz Emalı Zavodunun ərazisində 11min ədəd, H.Z. Tağıyev adına NQÇİ-nin mədən ərazisində 6 624 ədəd, “Abşeronneft” NQÇİ-nin mədən ərazisində 18 304 ədəd, "BibiHeybətneft" NQÇİ-nin mədən ərazisində 49 012 ədəd, müxtəlif növ ağac və bəzək kollarına aqrotexniki xidmətlər göstərmişlər. Yaşıllıq sahələrində mövsümi işlər yerinə yetirilmiş, bitkilərin normal inkişafı üçün məqsədyönlü tədbirlər görülmüşdür.
2014-cü ildə "Azneft" İB-nin yaşıllaşdırma tədbirlərinin həyata keçirilməsi və mövcud sahələrin genişləndirilməsi tədbirlər planı çərçivəsində TRD kollektivinin yaxından iştirakı ilə ARDNŞ-nin Qaz Emalı Zavodunun ərazisində 2 200 ədəd, "Abşeronneft" NQÇİ-nin mədən ərazilərində (Pirallahı qəsəbəsi) 4 124 ədəd, "BibiHeybətneft" NQÇİ-nin mədən ərazisində 1000 ədəd, H.Z. Tağıyev adına NQÇİ-nin mədən ərazisində isə 1 800 ədəd zeytun, sərv, eldar şamı ağacları və dekorativ bəzək kolları əkilmişdir.
Yaşıllıq sahələrinin bərpası məqsədilə, ting ehtiyatının artırılması üçün "BibiHeybətneft" NQÇİ-nin mədən ərazisində fəaliyyət göstərən TRD-nin 3-cü sahəsində 2013-cü ildə tikilib istifadəyə verilmiş 320 m2 -lik istixanada 8 minə qədər akasiya, həmişəyaşıl oleyandr, iydə və s. ağacların toxumları əkilərək aqrotexniki xidmətlər göstərilmiş və normal bitiş alınmışdır. Hazırda bu işlər davam etdirilir və gözlənilən nəticələrin əldə olunması üçün zəruri tədbirlər həyata keçirilir.
Hazırda QSC-nin Torpaqların Rekultivasiyası Departamenti qış mövsümündə xidmət göstərdiyi yaşıllıq sahələrindəki ağacların mühafizəsi və cari ilin yaz mövsümünə hazırlıq işlərini uğurla davam etdirir.
tarix : 12.01.2015
|