Hazırda sahələrdə yaz mövsümünə hazırlıq işləri  yerinə yetirilir.  Ağaclar budanır, dibləri boşaldılır və sahələr alaq otlarından təmizlənir. Bitkilər üçün lazım olan üzvi,  mineral gübrələr, münbit torpaq və  peyin  tədarük edilir. Qrunt sularının axıdılması üçün sahələrə  əlavə  arxlar çəkilir və digər qabaqlayıcı tədbirlər görülür.
     Bu işləri həyata keçirən QSC-nin Torpaqların Rekultivasiyası  Departamentinin (TRD) istixanalarında yaşıllıq sahələrinin bərpası məqsədilə yetərincə müxtəlif növ ağac və  bəzək kollarının  tingləri  yetişdirilmişdir. Əlverişli hava şəraitində bu tinglərdən istifadə etməklə,  qurumuş və zəif inkişaf etmiş ağac və kolların bərpası həyata keçiriləcəkdir.
    “Ekol Mühəndislik Xidmətləri” QSC-nin TRD hazırda ARDNŞ-nin Qaz Emalı Zavodunun ərazisində  11 min ədəd,  "Azneft" İB-nin  "Abşeronneft" NQÇİ-nin mədən ərazisində 13 min 524 ədəd, "BibiHeybətneft" NQÇİ-nin mədən ərazisində 45 min 207 ədəd, H.Z.Tağıyev adına NQÇİ-nin  mədən ərazisində  isə 4 min 420 ədəd, ümumilikdə 74 min 151 ədəd  müxtəlif  növ ağac və bəzək kollarına aqrotexniki  xidmətlər  göstərilir.
     QSC-nin xidmət göstərdiyi yaşıllıq sahələrində yaz mövsümünə hazırlıq işləri  yüksək templə   davam etdirilir.