"Ekol Mühəndislik Xidmətləri" QSC sənaye-çirkab, axıntı və lay sularının təmizlənməsi və neftşlamın emalı proseslərinin təkmilləşdirilməsi, effektliyinin artırılması məqsədilə nanotexnologiyaların axtarışı və istehsalata tətbiqi istiqamətində məqsədyönlü tədbirlərini davam etdirir. Bu məqsədlə dünyanın bir çox analoji şirkətləri ilə görüşlər keçirilir və əməkdaşlıq əlaqələri yaradılır.
Bu tədbirlər çərçivəsində növbəti görüş martın 3-də QSC-nin baş ofisində Türkiyənin AKGİRİŞİM Kontrakt, Konsaltinq və Ətraf Mühit Texnologiyaları A.Ş. şirkətinin nümayəndələri ilə keçirilmişdir. Görüşdə QSC-nin baş direktoru Ramil Əliyev, baş direktorun istehsalat üzrə müavini-Texniki direktor Məzahir Hüseynov, əlaqədar departament və şöbə rəisləri, eləcə də AKGİRİŞİM şirkətinin baş direktorunun müavini Ahmet H. Maraşlı, təklif və kontrakt müdiri Ahmet Karataş və COOLMORE ALLIANCE L.P şirkətinin prezidenti Vüqar Quliyev iştirak etmişlər.
Baş direktor Ramil Əliyev qonaqları səmimi salamlayaraq, onlara "Ekol Mühəndislik Xidmətləri" QSC haqqında qısa məlumat verdikdən sonra söz qonaqlara təqdim olundu.
Ahmet H.Maraşlı səmimi qəbula görə QSC rəhbərliyinə öz minnətdarlıqlarını bildirdi və təmsil etdikləri şirkət haqqında görüş iştirakçılarına məlumat verdi. O qeyd etdi ki, Akkök Holdinqin iri təsisçiləri tərəfindən yaradılmış AKGİRİŞİM şirkəti uzun illərdir ki, fəaliyyət göstərir və Türkiyənin qabaqcıl inşaat şirkətlərindən biridir və dünyanın bir çox ölkələrində müxtəlif layihələr həyata keçirir. Şirkət sənaye və mədəni-məişət obyektlərinin eləcə də yaşayış binalarının tikintisi, kimya sənayesi ilə yanaşı, bir sıra mühəndislik xidmətlərinin göstərilməsi, həmçinin çirkab-axıntı sularının təmizlənməsi və dəniz suyunun şirinləşdirilməsi kimi fəaliyyət sahələri ilə də məşğuldur.
Ahmet H. Maraşlı bildirdi ki, bu görüşün əsas məqsədi AKGİRİŞİM şirkətinin çirkab-axıntı sularının təmizlənməsi texnologiyaları və istehsal etdikləri kimyəvi reagentlər haqqında "Ekol Mühəndislik Xidmətləri" QSC-ni məlumatlandırmaqdan və bu sahədə əməkdaşlıq etməkdən ibarətdir. Sonra o çirkab-axıntı sularının təmizlənməsi texnologiyaları və istehsal etdikləri kimyəvi reagentlər haqqında elektron məlumatları görüş iştirakçılarına təqdim etdi.
Görüş iştirakçıları tərəfindən mövzu ətrafında geniş müzakirələr aparıldı və sual doğuran məsələlərə aydınlıq gətirildi.
QSC-nin baş direktoru Ramil Əliyev maraqlı məlumatlara və təklifə görə AKGİRİŞİM şirkətinin nümayəndələrinə təşəkkürünü bildirdi. O, eyni zamanda qeyd etdi ki, təklif olunan reagentlərin QSC-nin xidmət sahələrinə tətbiq olunması üçün öncə ikitərəfli araşdırmalar aparılmalı və konkret nəticələr əldə edilməlidir. Yalnız bundan sonra əməkdaşlıq əlaqələrinin mümkün variantlarını müzakirə etmək olar.
Sonda qərara alındı ki, AKGİRİŞİM şirkətinin nümayəndələri QSC-nin sənaye-çirkab, axıntı sularını təmizləyən xidmət sahələri ilə əyani tanış olsunlar. Uyğun reagentlərin aşkar edilməsi üçün bu suların mövcud analitik təhlil materialları əsasında öz laboratoriyalarında sınaqlar keçirərək növbəti görüş üçün konkret təkliflər paketi hazırlasınlar.
Bununla da görüş qarşılıqlı anlaşma şəraitində başa çatmışdır.
tarix : 05.03.2015
|