Martın 19-da “Ekol Mühəndislik Xidmətləri” QSC-nin baş ofisində və xidmət sahələrində Novruz bayramı ilə əlaqədar tədbir keçirilmişdir. Tədbirdə çıxış edən QSC-nin baş Direktoru Ramil Əliyev bu bayramın tarixindən və milli-mənəvi dəyərlərindən danışaraq qeyd etmişdir ki, xalqımızın özünüdərkində və təfəkkürünün inkişafında böyük rol oynayan, təbiətin əbədi qanunları ilə həmahəng olan Novruz bayramı milli varlığımıza hopan bir el şənliyidir. Bu bayram tarixin ən çətin anlarında insanların həyatına daxil olaraq onlarda xoşbəxt gələcəyə inam duyğusu yaratmışdır. Ulularımızın daxili aləminin zənginliyini nümayiş etdirən Novruz günlərində ölkəmizin hər yerində, hər evdə, hər ailədə bayram əhval-ruhiyyəsi hökm sürür.
Ramil Əliyev bildirmişdir ki, sovet ideologiyasının tüğyan etdiyi dövrlərdə bu bayrama qadağalar qoyulsa da, xalqımız adət-ənənəsini yaşatmağı bacarmışdır. Əsrlər boyu hər bir azərbaycanlı ailəsində yaşanan Novruz bayramı respublikamızın müstəqillik əldə etməsi ilə artıq neçə illərdir ki, dövlət səviyyəsində böyük təntənə ilə qeyd olunur. Ümummilli lider Heydər Əliyev Novruz bayramını xalqımızı tarixən bütövləşdirən, onun varlığını birlik, bütövlük və yaşam gücü ilə qidalandıran fenomen kimi qiymətləndirmişdir. Bu milli tarixi nailiyyət Azərbaycan Prezidenti İlham Əliyev cənabları tərəfindən də aydın və birmənalı şəkildə təsdiq olunmuşdur. Bu günlərdə Novruz şənlikləri ölkəmizin hər yerində, eləcə də soydaşlarımızın yaşadığı müxtəlif xarici ölkələrdə geniş şəkildə qeyd edilir. Bu mərasimlərdə yaranan xoş ünsiyyət insanları bir-birinə daha da yaxınlaşdırır. Hər bir soydaşımızda milli mənlik şüurunu, azərbaycançılıq hisslərini və duyğularını gücləndirir. Çıxışının sonunda Ramil Əliyev QSC-nin kollektivini Novruz bayramı münasibəti ilə təbrik etmiş, onlara can sağlığı, bol ruzi-bərəkət və işlərində müvəffəqiyyətlər arzulamışdır. Tədbirdə çıxış edən baş direktorun müavinləri Məzahir Hüseynov, Rəşad İsmayılov, İqtisadiyyat və uçot idarəsinin rəisi Əli Bağışov və başqaları da kollektivin bütün üzvlərini bayram münasibətilə təbrik edərək onlara xoş arzularını bildirmişlər.
tarix : 19.03.2015
|