"Ekol Mühəndislik Xidmətləri" QSC-də Beynəlxalq İdarəetmə Sistemlərinin (BİS) tələblərinə əməl olunması və bu standartların dərindən mənimsənilməsi istiqamətində ardıcıl tədbirlər həyata keçirilir. Xidmətlər BİS-nin prosedura qaydalarına uyğun olaraq göstərilir və dövrü olaraq aparılan daxili auditlər nəticəsində aşkar edilmiş uyğunsuzluqların qısa zamanda aradan qaldırılması üçün qabaqlayıcı tədbirlər görülür. Bununla yanaşı, BİS-nin tələblərinə əməl olunmasının düzgünlüyünün yoxlanılması məqsədilə nəzərdə tutulmuş vaxtlarda üçüncü tərəf (xarici) auditləri keçirilir.
Aprelin 6-da Türk Standartları İnstitutunun tədqiqçiləri tərəfindən QSC-də növbəti xarici auditin keçirilməsinə başlanmışdır. Bununla əlaqədar olaraq aprelin 6-da, QSC-nin mərkəzi ofisində auditin açılış toplantısı keçirilmişdir. Toplantıda QSC-nin baş direktoru Ramil Əliyev, baş direktorun müavinləri, departament və şöbə rəisləri, həmçinin Türk Standartları İnstitutunun (TSE) Azərbaycan təmsilçisi Səlim Çelebi, auditorlar Sərvət Atayetər və Tuncay Çimen, iştirak etmişlər. QSC-nin Baş direktoru Ramil Əliyev TSE-nin təmsilçilərini səmimi salamlayaraq ötən dövr ərzində BİS-nin tələblərinə uyğun olaraq görülmüş işlər barədə onlara ətraflı məlumat vermiş və bu sahədə əldə olunan uğurlardan danışmışdır. Baş direktor qeyd etmişdir ki, ötən auditlər nəticəsində aşkar olunmuş uyğunsuzluqların qısa zamanda aradan qaldırılması üçün qabaqlayıcı tədbirlər həyata keçirilmişdir. TSE-nin Azərbaycan təmsilçisi Səlim Çelebi səmimi qəbula görə minnətdarlıqlarını bildirmiş və qeyd etmişdir ki, "Ekol Mühəndislik Xidmətləri" QSC Azərbaycanda İSO 9001, İSO 14001 və OHSAS 18001 Beynəlxalq İdarəetmə Sistemlərini qəbul edən və onun tələblərini uğurla həyata keçirən nümunəvi şirkətlərdən biridir. O, Beynəlxalq Standartlar sahəsində QSC-də görülən işlərdən və əvvəlki auditlərin nəticələrindən razı qaldıqlarını vurğulayaraq, keçiriləcək növbəti auditin də müsbət nəticələrlə başa çatacağına əminliyini bildirmişdir. Baş direktor Ramil Əliyev TSE-nin təmsilçilərinə uğurlar arzulamış, auditin şəffaf və işgüzar şəraitdə keçməsi üçün hərtərəfli şərait yaradıldığını qonaqların diqqətinə çatdırmışdır. TSE təmsilçilərinin üçüncü tərəf auditinin QSC-nin struktur bölmələri əhatə olunmaqla, aprel ayının 6-dan 9-dək keçirilməsi nəzərdə tutulmuşdur.
tarix : 06.04.2015
|