Ekol Mühəndislik Xidmətləri” QSC-də İSO-9001, İSO-14001 və OHSAS-18001 Beynəlxalq İdarəetmə Sistemləri (BİS) standartlarının tələblərinə əməl olunması və standartlara uyğunluğun yoxlanması üzrə Türk Standartları İnstitutunun (TSE) auditorları tərəfindən aprelin 6-da başlayan, şəffaf və işgüzar şəraitdə keçirilən audit bu gün başa çatmışdır.
Bununla əlaqədar olaraq, aprelin 9-da QSC-nin baş ofisində auditin qapanış toplantısı keçirilmişdir. Toplantıda auditin nəticələri müzakirə edilmiş, auditorlar nəticələr barədə QSC-nin rəhbərliyinə və kollektivin nümayəndələrinə məlumat vermişlər. Qeyd olunmuşdur ki, audit ayrı-ayrı şöbələrdə və xidmət sahələrində keçirilmiş, hər üç standartın tələblərinə yüksək səviyyədə əməl olunduğu aşkar edilmişdir. Bir neçə xırda uyğunsuzluqlar nəzərə alınmaqla nəticələr ümumən qənaətbəxş olmuşdur. TSE-nin Azərbaycan təmsilçisi Səlim Çelebi, Azərbaycanda BİS-nin tam mənimsənilməsi, təkmilləşdirilməsi və standartların tələblərinə əməl olunması sahəsində “Ekol Mühəndislik Xidmətləri” QSC-nin fəaliyyətini müsbət qiymətləndirmişdir. O, keçirilən auditin nəticəsi olaraq QSC-nin İSO-14001 standartları üzrə fəaliyyətinin təsdiqləndiyini, İSO-9001 və OHSAS-18001 standartları üzrə isə yeniləndiyini toplantı iştirakçılarının diqqətinə çatdırmışdır. Toplantıda çıxış edənlər, QSC-nin baş direktoru Ramil Əliyev, baş direktorun məsləhətçisi Kamil Akimov, Ekoloji Monitorinq Departamentinin rəisi Şahabiddin Albuşov və başqaları auditin şəffaf şəraitdə keçirilməsinə, dəyərli tövsiyələrinə və göstərdikləri dəstəyə görə TSE təmsilçilərinə öz dərin təşəkkürlərini bildirmişlər. Eyni zamanda, Ramil Əliyev keçirilən auditin nəticəsində aşkarlanmış uyğunsuzluqların qısa zamanda aradan qaldırılacağını və bundan sonra da QSC-nin bütün fəaliyyət sahələrində İSO-9001, İSO-14001 və OHSAS-18001 Beynəlxalq İdarəetmə Sistemlərinin tələblərinə yüksək səviyyədə əməl olunacağını TSE təmsilçilərinin diqqətinə çatdırmışdır. Sonda TSE təmsilçilərinə xatirə hədiyyələri təqdim olunmuş və bununla da TSE təmsilçilərinin QSC-də dörd gün ərzində keçirdikləri üçüncü tərəf auditin nəticələrinə həsr olunmuş qapanış toplantısı başa çatmışdır.
tarix : 09.04.2015
|