Neftşlam neftin hasilatı, saxlanılması, daşınması və emalı prosesində formalaşır. Neft sənayesi sahələrində formalaşan neftşlam ətraf mühitə mənfi təsir edən əsas amillərdən biridir. Bununla əlaqədar olaraq, neftşlamın emalı və zərərsizləşdirilməsi, onun tərkibində olan komponentlərin təkrar xammal kimi istifadəsi günün aktual ekoloji problemlərindəndir.
Tədqiqatlarla müəyyən edilmişdir ki, faza tərkibinə görə neftşlam üç hissədən, neft məhsulları, su və mexaniki qarışıqlardan ibarətdir. Neftşlamın tərkib komponentlərinin nisbəti xam neftin növündən, neftin emalı prosesindən, axıntı sularının təmizlənməsi üçün istifadə olunan reagentlərdən və s. asılı olaraq dəyişir. Açıq anbarlarda uzun müddət saxlanılan neftşlam isə keyfiyyət etibarilə dəyişir. Zaman keçdikcə yüngül fraksiyaların buxarlanması, neft məhsullarının oksidləşməsi və qətranlaşması nəticəsində neftşlam daha çətin emal olunan kütləyə çevrilir. Hal-hazırda neftşlamın bir sıra utilizasiya texnologiyaları mövcuddur. "Ekol Mühəndislik Xidmətləri" QSC-nin xidmət göstərdiyi Neft Emalı Zavodlarında formalaşan neftşlamın emalı və zərərsizləşdirilməsi isə İsveçin "Alfa laval" şirkətinin istehsalı, məhsuldarlığı 30 m3/saat olan dekantor və İtaliyanın "Pieralisi" şirkətinin istehsalı, məhsuldarlığı 20 m3/saat olan trikantor qurğuları vasitəsilə həyata keçirilir. Emal olunan neftşlam quru qalığa və neftli suya ayrılır ki, sonradan bu sular mexaniki üsulla təmizlənərək neft məhsullarından ayrılır. Maye fazadan ayrılmış neft məhsulları təkrar emala göndərilir. QSC-nin Ekoloji Monitorinq Departamentinin Kompleks Tədqiqatlar laboratoriyası tərəfindən mütəmadi olaraq təmizləyici qurğuların giriş və çıxışından nümunələr götürülərək analitik təhlillər aparılır. Nəticədə qurğunun effektivliyi, neftşlamın bərk və maye fazalarının nümunələrində neft məhsullarının, mexaniki qarışıqların və suyun miqdarı müəyyən edilir. Bununla yanaşı neftşlamın emalı və zərərsizləşdirilməsinin digər üsulları da araşdırılır, bioloji və kimyəvi maddələrin təsiri ilə neft məhsullarının daha effektiv ayrılması istiqamətində laborator sınaq təcrübələri aparılır. Tədqiqatların nəticəsi isə emal texnologiyalarının və qurğularının seçilib tətbiq edilməsi üçün zəmin yaradır. "Ekol Mühəndislik Xidmətləri" QSC neftşlamın xaraskteristikalarının yeni üsullarla öyrənilməsi və ən müasir texnologiyaların seçilib gələcək layihələrə tətbiq edilməsi istiqamətində araşdırmalarını davam etdirir.
tarix : 22.04.2015
|