İstehsalat təcrübəsində Bakı Dövlət Universitetinin ekologiya və torpaqşünaslıq fakultəsinin 25 nəfərdən ibarət III kurs tələbə heyyəti iştirak edir. Ekoloji Monitorinq Departamentinin rəisi, istehsalat-təcrübə rəhbəri Şahabiddin Albuşov tələbələrə "Ekol Mühəndislik Xidmətləri" QSC-nin yaranma tarixi, maddi-texniki bazası əsas fəaliyyət sahələri və həyata keçirdiyi ekoloji layihələr haqqında geniş məlumat vermişdir.  Həmçinin onları sənaye-çirkab, axıntı sularının təmizlənməsi, neftşlamın emalı və zərərsizləşdirilməsi prosesləri, çirklənmiş torpaqların təmizlənməsi, reabilitasiya olunmuş ərazilərdə yaşıllıqların salınması və aqrotexniki xidmətlərin göstərilməsi qaydaları,  eləcə də  texnoloji qurğuların iş prinsipləri ilə yaxından tanış etmişdir.

      İstehsalat təcrübəsi müddətində tələbələr, təmizləyici qurğunun effektinin müəyyənləşdirilməsi üçün qurğuya daxil olan sənaye axıntı sularının ayrı-ayrı mərhələlərdə iş prinsipini öyrənir, qurğunun çıxışından su nümunələrinin götürülməsi və laboratoriyada fiziki kimyəvi təhlillərinin aparılması ilə bağlı təcrübələr keçirlər. İstehsalat təcrübəsi iyun ayının 23-nə qədər davam edəcəkdir.