"Ekol Mühəndislik Xidmətləri" QSC-nin fəaliyyət sahələrində istehsalatın fasiləsizliyinin və texniki təhlükəsizliyinin təmin olunması, qurğu və avadanlıqların daim saz vəziyyətdə işləməsi, eləcə də istehsalat sahələrinin müntəzəm olaraq elektrik enerjisi, su və qazla təmin edilməsi nailiyyətlərin əldə olunmasına təsir edən əsas amillərdəndir. Bunu nəzərə alan QSC-nin Elektromexanika sexinin kollektivi əvvəlki illərdə olduğu kimi 2015-ci ilin I yarımilliyində də vəzifə öhdəliklərinə layiqincə əməl edərək yüksək peşəkarlıq nümayiş etdirmişlər.
2015-ci ilin I yarımilliyi ərəfəsində Elektromexanika sexinin kollektivi tərəfindən Tullantıların Emalı Departamentinin 5-ci və 6-cı sahələrində (Heydər Əliyev adına NEZ-nun 9-cu sahəsi ) yüksək səviyyədə təmir işləri görülmüşdür. “Alfa Laval” şirkətinin dekantr qurğusuna gələn buxar xətti və kondensat xəttinin bir hissəsi yenidən bərpa olunmuş, bıçaqları dəyişdirilmiş, çəndən gələn ümumi xəttə 100 mm-lik yeni xətt çəkilərək birləşdirilmiş, kompressor quraşdırılmış, gərginlik xətləri üçün yeni estekada düzəldilmiş və gərginlik verilərək qurğu işə buraxılmışdır. Dekantr və trikantr qurğularında P-1 və P-2 nasosları yenisi ilə dəyişdirilmiş, patonsiometrlər quraşdırılmışdır. 6 ay ərzində qrafik əsasında 52, 55 və 30 saylı yarımstansiyalarda elektrik ampermetri, voltmetri və termometrləri dəyişdirilmiş, bütün mühərriklərin və nasosların yastıqları yağlanmışdır. “Ekol Mühəndislik Xidmətləri” QSC-nin Torpaqların Rekultivasiya Departamentinin “Bibiheybət”, A-4, Qala, Pirallahı, Balaxanı sahələrində olan elektrik avadanlıqları təmir olunmuş, işıqlanma bərpa olunmuş və gərginliklə təmin olunmuşdur. Bu ilin I yarımilliyində Elektromexanika sexi QSC-nin istehsalat sahələrində qazanxanalarda olan bütün nəzarət ölçü cihazları yenilənmiş, 13, 3, 24 №-li nasoslarının arxa və ön qapaqları təmir olunaraq yerinə yığılıb və yenidən istismara buraxılmışdır. 36, 37 №-li nasosxananın dam örtüyü yenidən bərpa olunmuşdur. 95/1 saylı neft tutucuda FQ nasosu üçün yeni fundament qurulmuş, nasos yerinə qoyulmuş, giriş-çıxış xətləri çəkilmiş, nasosa gərginlik verilmiş və yoxlanılaraq istismara buraxılmışdır. Mütəmadi olaraq VK və “Börger” nasoslarının işlək istismara yararsız hissələri dəyişdirildi. Sahədə olan yanğından mühafizə şitləri təmir və bərpa olunmuş, güc kabellərin izolyasiyası yoxlanılmışdır. Flatator nasosxanasında suyun səviyyəsini saxlamaq üçün yeni tənzimləyici xətt çəkilmişdir. Cəmiyyətin 1 və 2 saylı sənaye axarlarında olan (20 ədəd) dəmir elektrik paylayıcı şkaflar, təzə plastmas paylayıcı qutularla əvəz olunmuş və onlara gələn kabellər dəyişdirilmişdir. A-1 və A-2 qəza anbarlarını əlaqələndirmək üçün yeni 100 mm-lik xətt çəkilmiş, qəza anbarlarını təmizləyən draqlayn EO – 5111 B markalı ekskavatorun rahat işləməsi üçün metal örtüklər yığılmışdır. 95/1-dən 95/6-ya qədər şlamı vurmaq üçün yeni 150 mm-lik plastmas boru xətti çəkilmişdir. 2015-ci ilin 6 ay ərzində Elektromexanika sexinin kollektivinin məqsədyönlü və işgüzar fəaliyyəti nəticəsində istehsalat sahələrində, təmizləyici və emal qurğularında aparılan mütəmadi cari və əsaslı təmir işləri təmizləmə və emal proseslərinin kəmiyyət və keyfiyyətinə öz müsbət təsirini göstərmişdir. Sexin peşəkar mütəxəssislərdən ibarət kollektivi QSC-nin istehsalat sahələrində texnoloji proseslərin fasiləsizliyinin təmin edilməsi və keyfiyyət göstəricilərinin artırılması istiqamətində fəaliyyətini əzmlə davam etdirir.
tarix : 24.08.2015
|