Martın 31-də Ekol Mühəndilsik Xidmətləri QSC-də Azərbaycanlıların soyqırımı qurbanlarının anım mərasimi keçirilmişdir. Mərasimdə rəhbərlik və digər natiqlər çıxış edərək təcavüzkar erməni millətçilərinin xalqımıza qarşı zaman-zaman etnik təmizləmə və soyqırımı siyasətini həyata keçirdiklərini qeyd etmişlər.
Həmçinin qeyd olunmuşdur ki, tarix boyu ermənilər və onları dəstəkləyən qüvvələr tərəfindən azərbaycanlılara qarşı məqsədyönlü şəkildə həyata keçirilmiş etnik təmizləmə və soyqırımı siyasəti nəticəsində minlərlə kənd yerlə - yeksan edilmiş, 100 minlərlə azərbaycanlı qətlə yetirilmiş, xalqımız ağır məhrumiyyətlərə, milli faciə və məşəqqətlərə düçar olmuşdur. Ermənilərin bu mənfur siyasəti bütün dövrlərdə xalqımız tərəfindən pislənmiş, bu soyqırımına hüquqi qiymət verilməsinə cəhd göstərmişlər. XX əsrin sonlarında Azərbaycan öz müstəqilliyini bərpa etdikdən sonra xalqımızın tarixi keçmişinin obyektiv mənzərəsini yaratmaq imkanı əldə etmişdir. Ümummilli lider Heydər Əliyevin 26 mart 1998-ci il tarixli “Azərbaycanlıların soyqırımı haqqında” fərmanı ilə ermənilərin xalqımıza qarşı dəfələrlə törətdikləri soyqırımı özünün hüquqi və siyasi qiymətini aldı. Bununla da Azərbaycan həqiqətləri bütün dünya ictimaiyyətinə, nüfuzlu beynəlxalq təşkilatlara çatdırıldı. Tədbirdə qeyd olunmuşdur ki, Azərbaycan Respublikasının Prezidenti İlham Əliyev cənablarının apardığı uğurlu siyasət nəticəsində erməni millətçilərinin iç üzü açılmış, onların siyasi riyakarlığı, əsrlərdən bəri həyata keçirdikləri işğalçılıq siyasəti dünya ictimaiyyətinə olduğu kimi çatdırılmışdır. Tədbirdə Azərbaycanlıların soyqırımı qurbanlarının xatirəsi bir dəqiqəlik sükutla yad edilmişdir. Soyqırımı ilə bağlı QSC-nin istehsalat sahələrində stendlər təşkil olunmuş, stendlərin önünə tər çiçəklər düzülmüşdür.
tarix : 31.03.2016
|