1-4 iyun 2016-cı il tarixlərdə Bakı EKSPO Mərkəzində keçirilən 23-cü Azərbaycan Beynəlxalq Xəzər Neft və Qaz sərgisi dünyanın neft sənayesi liderlərini ölkənin paytaxtı Bakı şəhərində yenidən bir araya gətirdi. Sərgiyə dünyanın 30 ölkəsindən 240 şirkət qatılmışdır.
İyunun 1-də sərginin açılışı olmuşdur. Açılış mərasimində Azərbaycan Respublikasının Prezidenti İlham Əliyev, Nazirlər, Komitə sədrləri, SOCAR-ın prezidenti, xarici səfirliklərin və şirkətlərin nümayəndələri, iri neft sənaye müəssisələrinin, idarələrin və təşkilatların rəhbərləri iştirak etmişlər. Mərasimdə çıxış edən ölkə başçısı, öncə sərgi iştirakçılarını təbrik etmiş və bu sərginin ölkələr və şirkətlər arasında qarşılıqlı əlaqələrin qurulmasında böyük əhəmiyyət kəsb etdiyini xüsusilə vurğulamışdır. Daha sonra Respublika Prezidenti neft-qaz və kimya sənayesi sahəsində respublikamızda, eləcə də dünyada baş verən müsbət dəyişikliklər barədə geniş məruzə etmiş, sərgi iştirakçılarına gələcək fəaliyyətlərində uğurlar arzulamışdır. Bir çox sahələri əhatə edən sərgidə, müxtəlif sahələrdə fəaliyyət göstərən şirkətlər, eləcə də dövlət müəssisələri arasında tanışlıq və əməkdaşlıq münasibətlərinin qurulması üçün əlverişli şərait yaranmışdır. “Ekol Mühəndislik Xidmətləri” QSC də iştirakçılarda maraq doğuran stendi və eksponatları ilə 23-cü “Xəzər Neft və Qaz 2016” sərgisinin iştirakçısıdır. QSC-nin fəaliyyət sahələrini və həyata keçirdiyi ekoloji layihələri əks etdirən elektron məlumatlar və əyani eksponatlar sərgi iştirakçıları tərəfindən maraqla izlənilir. Azərbaycan dünyada neft-qaz sənayesindəki proseslərə töhfəsini verməklə mühüm görüş yeri olduğunu bir daha sübuta yetirəcəkdir. 23-cü “Xəzər Neft və Qaz 2016” sərgisi iyunun 4-nə qədər davam edəcəkdir.
tarix : 01.06.2016
|