“Ekol Mühəndislik Xidmətləri” QSC-nin Baş ofisində və istehsalat sahələrində 18 oktyabr-Azərbaycanın Respublikası Dövlət Müstəqilliyinin bərpasının 25-ci ildönümü ilə əlaqədar tədbirlər keçirilmişdir. Tədbirlərdə çıxış edənlər QSC-nin kollektivini bu tarixi hadisə münasibəti ilə təbrik etmiş, onlara can sağlığı, müstəqilliyimizin daha da möhkəmləndirilməsi və əbədi yaşaması naminə əmək fəaliyyətlərində uğurlar arzulamışlar.
Çıxış edənlər Milli Müstəqilliyimizin tarixi məqamlarını iştirakçıların diqqətinə çatdırmışlar. Qeyd olunmuşdur ki, Azərbaycan xalqı öz müstəqilliyinə qovuşmaq üçün mübarizələrlə dolu çox çətin və şərəfli tarixi bir yol keçmişdir. 1991-ci il Oktyabrın 18 isə Azərbaycanın Dövlət Müstəqilliyi haqqında Konstitusiya Aktının qəbul olunduğu gündür. Belə bir tarixi şəraitdə, 1993-cü ilin iyununda xalqın təkid və tələbi ilə hakimiyyətə gələn Heydər Əliyev özü ilə bərabər Azərbaycana siyasi müdriklik gətirdi. Məhz ümummilli liderin zəngin siyasi təcrübəsi, yüksək idarəçilik bacarığı vətənə olan tükənməz sevgisi Azərbaycanın dövlət müstəqilliyini təhlükədən qurtardı. Ümummilli lider Heydər Əliyev "müstəqilliyi qorumağı onu əldə etməkdən qat-qat çətindir" fikri ilə nəhəng dövlət quruculuğu işlərinə başladı. Ulu öndər qarşıya çıxan bütün çətinlikləri qısa vaxt ərzində dəf etməklə Azərbaycanın səsinin ən nüfuzlu beynəlxalq təşkilatların kürsüsündən eşidilməsinə nail oldu. Natiqlər xüsusilə vurğulamışlar ki, Dövlət Müstəqilliyimizin əldə olunmasında müstəsna rolu olmuş ümummilli lider Heydər Əliyevin siyasi kursu ötən illərdə və hal hazırda uğurla davam etdirilir. Azərbaycan Respublikasının Prezidenti İlham Əliyev cənablarının apardığı uğurlu siyasət nəticəsində keçən 25 ildə ölkəmiz öz müstəqilliyini bütün dünyada tanıtmış, beynəlxalq təşkilatların üzvlüyünə qəbul edilmiş, dünya dövlətləri ilə bərabərhüquqlu əlaqələr yaranmışdır. Bu illərdə daxili və xarici qüvvələrin təxribat və maneələrinə baxmayaraq, dövlət müstəqilliyimiz qətiyyətlə qorunmuş və onun yaşaması üçün vacib olan bütün tədbirlər görülmüşdür. Tədbirlərdə qeyd olunmuşdur ki, Azərbaycanın dövlət müstəqilliyi xalqımızın tarixi nailiyyətidir. Hər birimizin müqəddəs borcu müstəqil dövlətimizin qədrini bilmək, onu qorumaq, inkişaf etdirmək, dünyanın ən inkişaf etmiş ölkələri səviyyəsinə çatdırmaq və bu mübarizədə daha möhkəm əzm, qətiyyət nümayiş etdirməkdən ibarətdir.
tarix : 18.10.2016
|