Qeyd olunmuşdur ki, 1919-cu ildən fəaliyyət göstərən Beynəlxalq Əmək Təşkilatı (BƏT) bütün dünyada əməyin mühafizəsinin aktuallığını nəzərə alaraq, bəşəriyyətin diqqətini insanların taleyinə, onların sağlam və təhlükəsiz əmək şəraiti ilə təmin olunması məsələlərinə yönəltmək məqsədi ilə, 28 apreli “Ümumdünya Əməyin Mühafizəsi Günü” elan etmiş və həmin ildən dünyanın bir çox ölkələrində qeyd olunmasına başlanmışdır.
2004-cü ildən etibarən Azərbaycanda da "Ümumdünya Əməyin Mühafizəsi Günü" dövlət səviyyəsində qeyd olunur. Hər il bir mövzuya həsr olunmuş bu günü 2017-ci ildə “Əməyin Mühafizəsinə dair məlumatların toplanmasının və istifadəsinin optimallaşdırılması. Profilaktika mədəniyyətinin möhkəmləndirilməsi” devizi altında keçirilməsinə qərar verilmişdir.
Çıxışlarda "Ümumdünya Əməyin Mühafizəsi Günü" ilə əlaqədar QSC üzrə həyata keçirilən tədbirlər, sağlam və təhlükəsiz əmək şəraitinin təmin olunmasına yönəldilmiş təşkilatı, texniki və sanitar-profilaktiki işlər haqqında geniş məlumat verilmiş, bu məsələnin daim diqqət mərkəzində olduğu xüsusilə vurğulanmışdır.
Texniki təhlükəsizlik şöbəsinin rəisi Səbuhi Veysəlov öz çıxışında QSC-nin Əməyin mühafizəsi üzrə Daimi Fəaliyyət göstərən Komissiyanın gördüyü işlərdən danışmış, bu sahədə görülən müsbət işlərlə yanaşı mövcud nöqsanlar və onların aradan qaldırılması istiqamətində həyata keçirilən tədbirlər barədə geniş məlumat vermişdir.
Tədbirdə əməyin mühafizəsi və texniki təhlükəsizlik sahəsində göstərdikləri yüksək peşəkarlığa görə, QSC-nin Elektromexanika sexinin ustası Əliyev Ramil, Tullantıların Emalı Departamentinin 4-cü sahəsinin çilingəri Bağırov Mirismayıl, Nəqliyyat sexinin sürücüsü Cəfərov Rövşən və Torpaqların Rekultivasiya Departamentinin 2-ci sahəsinin bağbanı Abdullayev Sahib "Təşəkkürnamə"lər ilə təltif olunmuşlar.
Tədbirin sonunda “Təşəkkürnamə” alan işçilər onların əməyinə verilən qiymətə, diqqət və qayğıya görə cəmiyyətin rəhbərliyinə öz minnətdarlıqlarını bildirmişlər.