8 Mart Beynəlxalq Qadınlar Gününün bayram edilməsi 1910-cu ildə, Kopenhagendə sosialist qadınların 2-ci Beynəlxalq Konfransında qərara alınmışdır. Artıq bir əsrdən artıqdır ki, bütün dünya ölkələri 8 Mart Beynəlxalq Qadınlar Gününü sülh uğrunda mübarizədə həmrəylik günü kimi qeyd edirlər.
Azərbaycan öz müstəqilliyini əldə etdikdən sonra da 8 Mart Beynəlxalq Qadınlar Günü istirahət günü olmaqla, bu bayram hər il respublikamızın hər yerində müəssisə və təşkilatlarda böyük təntənə ilə qeyd edilir. Martın 7-də ənənəvi olaraq “Ekol Mühəndislik Xidmətləri” QSC-nin baş ofisində və xidmət sahələrində də bu əlamətdar gün münasibətilə tədbirlər keçirilmişdir. Tədbirləri çıxış sözü ilə açan cəmiyyətin Baş direktoru Ramil Əliyev və digər natiqlər kollektivin qadın üzvlərini 8 Mart - Beynəlxalq Qadınlar günü münasibətilə təbrik etmiş, respublikamızın ictimai-siyasi həyatında, dövlət quruculuğunda və iqtisadi inkişafında qadınların rolunu xüsusilə qeyd etmişlər. Çıxışlarda QSC-nin kollektivinin 20%-ə qədərini təşkil edən qadınların əməyi yüksək qiymətləndirilmiş, onlara can sağlığı, uzun ömür, ailə səadəti və işlərində müvəffəqiyyətlər arzulanmışdır. Sonda QSC-nin rəhbərliyi tərəfindən qadın kollektivinin hər bir üzvünə tər çiçəklər və pul mükafatı təqdim olunmuşdur. Tədbirdə iştirak edən kollektivin qadın üzvləri göstərdikləri diqqət və qayğıya görə QSC rəhbərliyinə öz dərin təşəkkürlərini bildirmişlər.
tarix : 07.03.2018
|