Sənaye-çirkab sularının müasir üsullarla və qəbul edilmiş normalara uyğun təmizlənməsi üçün QSC-də mütəmadi olaraq zəruri tədbirlər həyata keçirilir.
Vaxtaşırı olaraq mexaniki təmizləmə qurğularının ayrı-ayrı hissələri çöküntülərdən təmizlənir və profilaktiki təmir işləri yerinə yetirilir.
Cari ilin iyun ayında mexaniki təmizləmə qurğuları sisteminə daxil olan 1, 2, 3 saylı nefttutucular çöküntülərdən təmizlənərək istismara verilmiş və digər neftutucularda təmizlənmə işləri davam etdirilir. Bu qurğularda görülən işlər nəticəsində sənaye-çirkab sularının təmizlənmə keyfiyyəti xeyli dərəcədə yaxşılaşmışdır ki, bu da ətraf mühitə öz müsbət təsirini göstərir.
Belə ki, görülən tədbirlər çərçivəsində əhəmiyyətli işlərdən biri də TED-nin 6-cı sahəsində (Heydər Əliyev adına NEZ-nun 9-cu sahəsi) fəaliyyət göstərən mexaniki təmizləyici qurğular sisteminə daxil olan çökdürücü göllərində təmizlənmə işlərinin aparılmasıdır. Hazırda 1-ci çökdürücü göldə yığılan mexaniki qarışıq, neftşlam təmizlənərək emal üçün “Alfa Laval” şirkətinin dekanter qurğusunun qəbul hovuzuna ötürülür və emal edilir. Bu da öz növbəsində H.Əliyev adına NEZ-dan daxil olan sənaye-çirkab sularının təmizlənməsinin keyfiyyətini xeyli yaxşılaşdırmışdır.
Təmizləyici qurğuların çöküntülərdən təmizlənməsi və profilaktiki təmir işləri digər çökdürücü göllərdə və nefttutucularda da mütəmadi olaraq yerinə yetiriləcəkdir.