“Ekol Mühəndislik Xidmətləri” QSC əsas fəaliyyət sahələri ilə yanaşı, ekologiya və mühəndislik xidmətləri sahəsində gənc mütəxəssislərin hazırlanmasına, eləcə də əhalinin ekoloji maariflənməsinə də yaxından dəstək göstərir. 

Bununla əlaqədar olaraq,  M.V.Lomonosov adına Moskva Dövlət Universitetinin, Bakı filialının kimya fakültəsinin IV-cü kurs tələbələri və professor müəllim heyəti ilə 26.08.2019-cu il tarixdən   “Ekol Mühəndislik Xidmətləri” QSC-nin Tullantıların Emalı Departamentinin 6-cı sahəsində, Heydər Əliyev adına NEZ-dan daxil olan sənaye axıntı sularını təmizləyən təmizləyici qurğuların yerləşdiyi sahədə istehsalat təcrübəsi keçirlər. 

“Ekol Mühəndislik Xidmətləri” QSC-nin (H.Əliyev adına NEZ-nun 9-cu sahəsi) istehsalat ərazisi ilə tanışlıqdan əvvəl təcrübə keçən tələbələrə əməyin mühafizəsi, texniki və yanğın təhlükəsizliyi üzrə təlimat keçirilmişdir. “Ekol Mühəndislik Xidmətləri” QSC-nin rəhbərliyi tərəfindən tələbələrin istehsalat təcrübəsinin müəyyən olunmuş qrafikə uyğun başa çatdırılması üçün bütün tədbirlərin görülməsinə şərait yaradılmışdır.

Təcrübə müddətində  Ekoloji Monitorinq Departamentinin rəisi müavini, təcrübəli mütəxəssis, ekoloq Hafiz Əbilov tələbələrə “Ekol Mühəndislik Xidmətləri” QSC-nin fəaliyyəti haqqında  geniş məlumat vermiş, onları sənaye-axıntı sularının təmizlənməsi, neftşlamın emalı və zərərsizləşdirilməsi prosesləri, eləcə də  texnoloji qurğuların iş prinsipləri ilə yaxından tanış etmişdir. Həmçinin,  tələbələr  neftşlam emal edən “Alfa-Laval” şirkətinin dekanter və “Pieralisi” şirkətinin trikanter qurğularında emal prosesləri ilə yaxından tanış olmuşlar. Onlara  QSC-də  ətraf mühitin mühafizəsi istiqamətində həyata keçiriləcək  yeni layihələr barədə  məlumat verilmişdir. 

Ali təhsil ocaqlarında  təhsil alan  tələbələrin  maarifləndirilməsi, onların elmi biliklərinin istehsalatla əlaqələndirilməsi və  gənc nəslin təcrübi biliklərinin artırılması “Ekol Mühəndislik Xidmətləri” QSC-nin  fəaliyyətinin  əsas  istiqamətlərindən  biridir və bu istiqamətdə daimi məqsədyönlü tədbirlər keçirilir.