“Ətraf Mühitin Strateji İdarə Edilməsi” təliminin əsas mövzu və proqramı “İSO 14001 Standartına uyğun ekoloji siyasət və idarəetmə”, “Şirkətdə vacib ətraf mühit aspektləri”, “Azərbaycanda ətraf mühitin qorunması üçün əsas şərtlər və ən yaxşı təcrübə”, “Təlimçi üçün təlim”dən ibarət olmuşdur.
13.10.2019-cu il tarixində Alman-Azərbaycan Xarici Ticarət Palatası (AHK Azərbaycan) tərəfindən “Azərbaycanda Ətraf Mühitin Mühafizəsi üçün əsas şərtlər və ən yaxşı təcrübə” mövzusu üzrə “Təhlükəli tullantılar”, “Su hövzələrinin mühafizəsi və sudan səmərəli istifadə”, “Emissiyalar”, “Tullantılar, mənbə və təkrar emal” mövzularında təlim kurslarının keçirilməsi “Ekol Mühəndislik Xidmətləri” QSC-nə təklif edilmişdir. Təlim keçiriləcəyi müddətdə mövzulara uyğun olaraq yüksək səviyyədə prezentasiyalar hazırlanmış və təqdim edilmişdir.
Təlimə “Ekol Mühəndislik Xidmətləri” QSC-nin Ekoloji Monitorinq Departamentinin (EMD) rəisi Şahabiddin Albuşov, departamentin rəis müavini Natella Şəfiyeva, departamentin iki nəfər mütəxəssisi Elçin Qumuxov və Eltəkin Abdullayeva iştirakçı qismində qatılmışlar. Üç gün ərzində təlimlər həm nəzəri, həm də praktiki olaraq keçirilmiş və dinlənilən mövzular ətrafında suallar cavablandırılmış, müzakirələr aparılmışdır. Daha sonra təlimin iki günündə “Ekol Mühəndislik Xidmətləri” QSC-nin xidmət göstərdiyi 6-cı sahədə (H.Əliyev adına NEZ-in 9 saylı sahəsi) sənaye axıntı sularını təmizləyən qurğularının, neftşlamı emal edən “Alfa Laval” şirkətinin dekanter, “Pieralisi” şirkətinin trikanter, FOX-15 sentrifuqa, parafinin sudan və mexaniki qarışıqlardan təmizlənməsi qurğularının texnoloji iş prinsipləri ilə təlim iştirakçıları yaxından tanış edilmişdir. Təlimin üçüncü günü Cəmiyyətimizin fəaliyyəti barədə dəyirmi masa arxasında məlumat verilmiş və “Caspian Ecology” sərgisində iştirak etmişlər.
Təlim zamanı “Ekol Mühəndislik Xidmətləri” QSC-nin həyata keçirdiyi ekoloji yönümlü layihələrin ətraf mühitin mühafizəsində müstəsna rolu olduğu qeyd edilmiş və ekoloji vəziyyətin yaxşılaşdırılmasına verilən töhfələr təlim iştirakçılarının diqqətinə çatdırılmışdır.
“Təlimçi üçün təlim” və digər kursların iştirakçılarına dünyanın 91 ölkəsində, o cümlədən Azərbaycanda tanınmış AHK Beynəlxalq Sertifikatları təqdim edilir. Bu da DİN-İSO 14001 standartının tələblərinə uyğun olaraq ətraf mühitin mühafizəsi sahəsində mütəxəssis və təlimçi kimi tanınmaq deməkdir.
Beləliklə də 22.11.2019-cu il tarixində Alman-Azərbaycan Xarici Ticarət Palatasında keçirilən təlim öz işini başa çatdırmışdır.