Yanvarın  20 -də minlərlə insanın Vətənin azadlığı və suverenliyi uğrunda canlarından keçmiş Azərbaycan oğul və qızlarının uyuduğu Şəhidlər Xiyabanı indi gənclərin and yerinə çevrilmişdir. Xalqımızın yaddaşına əbədi həkk olunmuş qanlı yanvar hadisələrinin 31 -ci ildönümü bu günlərdə Respublikamızın hər yerində dərin hüznlə və ehtiramla anılır, şəhidlərin ruhuna dualar oxunur.

          20 yanvar şəhidlərinin anım günündə Azərbaycan Respublikasının Prezidenti, Müzəffər Ali Baş Komandan, cənab İlham Əliyev və Birinci vitze-prezident Mehriban xanım Əliyeva ölkəmizin azadlığı uğrunda həlak olanların xatirəsini yad ediblər. Dövlət başçımızın dediyi kimi ikinci Qarabağ müharibəsi tarixdə Azərbaycanın şanlı qələbəsi kimi qalacaq: “Bu qələbənin qazanılmasında bütün xalqımız birlik və həmrəylik göstərmişdir. Biz bu müharibəni şəhidlərimizin canı-qanı bahasına, hərbiçilərimizin rəşadəti hesabına, dövlətimizin siyasəti hesabına qazanmışıq. Allah həm birinci Qarabağ müharibəsinin, həm ikinci Qarabağ müharibəsinin,  həmdə 20 Yanvar şəhidlərimizə rəhmət eləsin! Allah bütün qazilərimizə, yaralı əsgər və zabitlərimizə şəfa versin.”

          Tarix sübut etdi ki, bu vəhşi terror aktı insanlığa qarşı törədilmiş ən ağır cinayətlərdən biri kimi bəşər tarixinə qara səhifə olaraq yazılmışdır. Lakin, 1990 -cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin faciəvi gecədə həlak olan vətən oğulları və qızları Azərbaycanın  tarixinə parlaq səhifə yazdılar, xalqın milli azadlığına və  müstəqilliyinə yol açdılar.

Anım günü ilə əlaqədar, QSC-nin baş ofisində və istehsalat sahələrində 20 yanvar hadisələrini əks etdirən stendlər təşkil edilmişdir.

Vətənin azadlığı və suverenliyi uğrunda canlarından keçmiş Azərbaycan oğul və qızlarının əziz xatirəsi heç zaman unudulmayacaqdır.