QSC-nin bu fəaliyyətini Tullantıların Emalı Departamentinin (TED) işçiləri həyata keçirir. Sənaye-çirkab sularının yüksək keyfiyyətlə təmizlənməsi üçün daim məqsədyönlü tədbirlər həyata keçirilir. Bu tədbirlər sırasında yeni texnologiyaların və qurğuların tətbiqi, mexaniki təmizləyici qurğuların neftşlamdan və mexaniki çöküntülərdən təmizlənməsi xüsusi əhəmiyyət kəsb edir.
Bununla əlaqədar olaraq, çökdürücü göllərdə mütəmadi olaraq təmizləmə işləri yüksək səviyyədə vaxtlı-vaxtında yerinə yetirilir.
Belə ki, 2021-ci il yanvar ayında TED-nin 6-cı sahəsində fəaliyyət göstərən 10 saylı çökdürücü göldən 238 m3 -dən çox neftşlam və mexaniki qarışıq təmizlənərək, emal üçün 5-ci sahədə yerləşən “Alfa Laval” şirkətinin dekanter qurğusunun qəbul hovuzuna ötürülmüş və emal edilmişdir. Bütün bu işlərin davamı olaraq 6 saylı çökdürücü göldə təmizləmə işləri davam etdirilir. Bu da öz növbəsində H.Əliyev adına NEZ-dan daxil olan sənaye-çirkab sularının təmizlənməsinin keyfiyyətini xeyli yaxşılaşdırmışdır.
TED-nin 4-cü sahəsindəki (H.Əliyev adına NEZ-nun 9-cu sahəsinin ərazisi) 15 KV gücündə məhsuldarlığı saatda 30 m3 olan mərkəzdənqaçma nasosu vasitəsi ilə 3 saylı mexaniki təmizləmə sistemində nefttutuculardan neft məhsulları yeraltı quyuya yığılaraq çənlərə vurulur.
Bütün bunlarla yanaşı Tullantıların Emalı Departamentinin göstərdiyi xidmətlər sırasında ərsin parafinin mexaniki qarışıqlardan ayrılaraq təmizlənməsi işlərinin 3-cü sahənin işçiləri yerinə yetirir.
Parafin sexində də texnoloji proseslərin fasiləsizliyinin təmin olunması və işlərin İSO standartlarının tələbləri səviyyəsində qurulması məqsədi ilə, mütəmadi olaraq profilaktiki təmizlik və təmir işləri həyata keçirilir.
Bu məqsədlə, “Ekol Mühəndislik Xidmətləri” QSC-də mütəmadi olaraq sənaye-çirkab sularının təmizlənməsi proseslərinin yaxşılaşdırılması və ətraf mühitin mühafizəsi istiqamətində tədbirlərin həyata keçirilməsi davam etdirilir.