Yay mövsümü ilə əlaqədar yaşıllıq sahələrində ağacların diblərinin boşaldılması, suvarılması işləri və gübrələrlə təmin edilməsi, həmçinin yaşıllıq sahələrində bərpa işlərinin aparılması istiqamətində zəruri tədbirlər görülür. Bu məqsədlə “Eko-Park” İnnovasiya Mərkəzində bitkilərin toxum, çiling və calaq vasitəsi ilə çoxaldılması və növbəti mərhələyə qablaşdırılması üçün istixanalardan, 2 ha ərazidə yerləşən və açıq hava şəraitində bitkilərin mövsümə uyğun əkilib-becərilməsi üçün fidanlıqda böyük əhəmiyyət kəsb edən işlər yerinə yetirilir. Eyni zamanda SOCAR-ın strukturuna daxil olan idarə, təşkilat və birgə müəssisələrin ərazilərində yaşıllıqların salınması üçün müxtəlif növ ağacların, bitkilərin, gül və bəzək kollarının yetişdirilməsi işləri yerinə yetirilir.
Hazırda TRD SOCAR-ın Qaz Emalı Zavodunun ərazisində 11 min 877 ədəd, "Azneft" İB-nin “BibiHeybətneft” NQÇİ-nin reabilitasiya olunmuş mədən ərazilərində 64 min 499 ədəd, “Abşeronneft” NQÇİ-nin olunmuş mədən ərazilərində (Pirallahı) 40 min 039 ədəd, H.Z. Tağıyev adına NQÇİ-nin reabilitasiya olunmuş mədən ərazilərində (Qala) 4 min 510 ədəd, TRD-nin inzibati binasının ərazisində (A-4 Zığ sahəsi) isə 4 min 553 ədəd müxtəlif növ ağac və bəzək kollarına yay mövsümü ilə əlaqədar aqrotexniki xidmətlər göstərilir.
Yaşıllıq sahələrindəki bitkilər lazım olan ehtiyat qida maddələri, üzvi və mineral gübrələr, münbit torpaq, peyin və su ilə mütəmadi olaraq təmin edilir. Əlavə olaraq quruyan ağacların yenisi ilə əvəz edilməsi işləri davam etdirilir.
Beləliklə TRD-nin 1-ci və 2-ci sahələrində çalışan işçilər ümumilikdə 32,69 ha sahədə 120 min 925 ədəd müxtəlif növ ağac, bəzək kolları və bitkilərə aqrotexniki xidmətlərin göstərilməsi zamanı COVİD-19 pandemiyası ilə əlaqədar qoruyucu vasitələr, əlcək, sosial məsafəyə riayət etməklə işləri yüksək səviyyədə yerinə yetirirlər.
QSC-nin Torpaqların Rekultivasiyası Departamentinin xidmət göstərdiyi yaşıllıq sahələrində yay mövsümi işlərinin aqrotexniki qaydalara uyğun və keyfiyyətlə yerinə yetirilməsi istiqamətində zəruri tədbirlər davam etdirilir.