Azərbaycan Respublikasının Prezidenti İlham Əliyevin 2020-ci il 2 dekabr Sərəncamına əsasən Vətən müharibəsində qəhrəmancasına döyüşmüş, ölkəmizin ərazi bütövlüyü uğrunda canlarını fəda etmiş, əsgər və zabitlərimizə, bütün şəhidlərimizə dərin ehtiram əlaməti olaraq hər il Sentyabrın 27-si Azərbaycanda Anım Günü kimi qeyd edilməsi qərara alınmışdır.
Anım tədbirində Cəmiyyətin rəhbərliyi, departament, şöbə rəisləri və kollektiv üzvləri iştirak etmişlər.
Tədbir zamanı “COVİD-19” Koronavirus infeksiyası ilə bağlı Azərbaycan Respublikasının Nazirlər Kabinetinin verdiyi qərarlara, SOCAR-ın əmr, qərar, sərəncamlar və tövsiyələrinə tam əməl edilmişdir.
Tədbirdə əvvəlcə Vətən uğrunda canından keçən bütün şəhidlərimizin əziz xatirəsi bir dəqiqəlik sükutla yad edildi. Sonra “Ekol Mühəndislik Xidmətləri” QSC-nin Baş direktoru Ramil Əliyev çıxış edərək “Dəmir yumruq” əks hücum əməliyyatı zamanı Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında rəşadətli Müzəffər Ordumuzun sona qədər qəhrəmancasına 44 günlük mübarizəsi nəticəsində Ermənistan işğalçı qüvvələri tərəfindən zəbt edilmiş torpaqlarımızın azad edilməsini böyük tarixi hadisə kimi qiymətləndirmişdir.
Çıxışının davamı olaraq Ramil Əliyev bildirdi ki, bugün biz hər birimiz Şəhidlərimizə və Qazilərimizə borcluyuq. Müstəqilliyimiz, Vətənimizin ərazi bütövlüyü, namus və ləyaqətimiz uğrunda mübarizəyə qatılmış bu cəsur qəhrəman igidlər Azərbaycan xalqının başını uca etdi. Heç vaxt unutmayacağımız və unutdurmayacağımız bu qəhrəmanlar hər bir Azərbaycan anasının əziz övladı, xalqımızın qüruru və iftixarı oldu. Rəşadət rəmzi olan bu qəhrəmanlar bugünkü və sabahkı gəncliyin əbədi amalı, and və uyuduğu məkan müqəddəs ziyarət yeri olduğunu bildirdi.
Daha sonra çıxış edənlər bir il bundan öncə xalqımızın Müzəffər Ali Baş Komandanı İlham Əliyevin ətrafında bir yumruq kimi birləşərək torpaqların işğaldan azad olunması uğrunda qalxdıqları haqq savaşından, müharibənin ən ağır günlərində ordu – xalq vəhdətindən, həmin şərəfli günlərdə istər hərbiçilərimizin, istərsə də arxa cəbhədə qorxmadan, çəkinmədən gecə - gündüz çalışan insanların mərdliyindən, rəşadətindən danışdılar.
Anım tədbiri “Ekol Mühəndislik Xidmətləri” QSC-nin fəaliyyət göstərdiyi bütün sahələrdə keçirilmişdir.
Allah bütün şəhidlərimizə rəhmət eləsin!
Şəhidlərimizin ruhu qarşısında baş əyirik!
Q A R A B A Ğ A Z Ə R B A Y C A N D I R ! ! !