Forumun məqsədi, sudan səmərəli istifadəni təşviq etmək, çirkab (tullantı) suların təkrar emalı vasitəsi ilə ətraf mühitə olan neqativ təzyiqlərin (footprint) azaldılması, bu sahədə olan effektiv və innovativ texnologiyaların öyrənilməsi, tətbiqi, o cümlədən dövlət və özəl sektorla sıx əməkdaşlıq mühiti yaradılmasından ibarətdir.

Tədbirin rəsmi açılışından sonra forumun təşkilatçısı açılış nitqi ilə iştirakçıları salamlamışdır. Daha sonra “Suyun İdarəedilməsi, Səmərəli Həllər və Qabaqcıl Texnologiyalar”, “Çirkab (tullantı) Sularının İdarəedilməsi, Təkrar Emal və Ətraf Mühitə Təsirləri”, “Suyun Keyfiyyəti, Analizatorlar və Nəzarət Texnologiyaları” (“Water Quality Management, Analyzers and Control Technologies”) mövzularında müvafiq spikerlər tərəfindən suyun təbiətdə rolu, onun həyat üçün vacibliyi və suyun mühafizə və idarə edilməsi ilə bağlı çıxışlar dinlənilmişdir.

Forumun keçirilməsi 3 paneldən ibarət olmaqla aidiyyəti dövlət qurumları, əlaqədar digər təşkilatlar, yerli və dünyanın aparıcı şirkətlərinin mütəxəssislərinin çıxışı, o cümlədən bütün maraqlı tərəflərin iştirakı ilə oflayn və onlayn formatda baş tutmuşdur. 

Forumda “Ekol Mühəndislik Xidmətləri” QSC-nin “Ekologiya İdarəsinin” rəis müavini professor Əflatun Həsənov və Ekoloji monitorinq departamentinin rəisi Şahabiddin Albuşov  iştirak etmişlər. Əflatun Həsənovun moderatorluğu və Spikerliyi ilə baş tutmuş növbəti paneldə o, suyun keyfiyyətinin idarə edilməsi,  eləcə də analizatorların mühüm rolundan danışmışdır.

Tədbirin yekununda forum iştirakçılarına müvafiq sertifikatlar təqdim edilmişdir.