Tədbir iştirakçıları əvvəlcə “Eko Park” İnnovasiya Mərkəzində yaradılmış şəraitlə tanış olmuşlar və Mərkəzin ərazisində ağac əkmişlər.

Mərkəzin konfrans zalında davam etdirilən tədbir Azərbaycan Respublikasının Dövlət himninin səslənməsi ilə başlamış və Ümummilli Lider Heydər Əliyevin, eləcə də ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilmişdir.

Sonra Müstəqillik Gününə həsr olunmuş videoçarx nümayiş etdirilmişdir. 

Tədbirin davamı olaraq Yeni Azərbaycan Partiyası Nizami rayon təşkilatının sədri Ramil Vəlibəyov, İctimai Sosial şöbənin rəisi Həmkarlar İttifaqı Komitəsinin sədri Əli Ələkbərov və başqaları öz çıxışlarında bildirdilər ki, Azərbaycan Respublikası Müstəqilliyinin əbədiliyi və dönməzliyi Ümummilli Lider Heydər Əliyevin adı ilə bağlıdır.

Daha sonra çıxış edənlər bildirdilər ki, Ümummilli Lider Heydər Əliyevin müstəqilliyimizin qorunub saxlanması və möhkəmlənməsi istiqamətində yorulmaz səyləri bu gün onun layiqli davamçısı Prezident İlham Əliyev tərəfindən davam etdirilir. Bu gün ölkəmiz Müstəqillik tarixinin ən şanlı və şərəfli dövrünü yaşayır. Bütün dünya Müstəqil Azərbaycanın gücünü, qüdrətini Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə rəşadətli Müzəffər Ordumuzun 44 gün ərzində işğal altındakı ərazilərimizin qaytarılması ilə nəticələnən Vətən müharibəsində aydın gördü. Bu tarixi zəfəri qazanan xalqımız bütün dünyaya nümayiş etdirdi ki, Azərbaycanın müstəqillliyi əbədi və dönməzdir. 

Çıxışlardan sonra mükafatlandırma mərasimi keçirildi. Mərasimdə Vətən müharibəsi qaziləri, şəhid ailələrinin üzvləri və partiya fəalları Fəxri Fərmanla təltif olundular.

Tədbirin sonunda gənc muğam ifaçısı Ülkər Abdullayeva çıxış etdi.