Tədbirdə QSC-nin rəhbərliyi, struktur bölmə rəhbərləri, kollektivin üzvləri iştirak etmişlər.
Çıxış sözü ilə tədbiri açıq elan edən Baş direktor Ramil Əliyev tədbir iştirakçılarını salamladı və 28 May - “Müstəqillik günü” münasibətilə təbrik etdi. Sonra, Ümummilli Lider Heydər Əliyevin əziz xatirəsi bir dəqiqəlik sükutla yad edildi.
Daha sonra Ramil Əliyev çıxışını davam etdirərək Şərqdə ilk demokratik müsəlman respublikası olan Azərbaycan Xalq Cümhuriyyətinin xalqımızın müstəqillik əzmini nümayiş etdirməsi, siyasi şüur səviyyəsinin, intellektual və mədəni potensialının, yüksək istedad və qabiliyyətinin göstəricisi olduğu, Ümummilli Lider Heydər Əliyevin müstəqilliyimizin qorunub saxlanması və möhkəmlənməsi istiqamətində yorulmaz səyləri bu gün onun layiqli davamçısı Prezident İlham Əliyev tərəfindən davam etdirdiyini bildirdi. Bu gün ölkəmiz Müstəqillik tarixinin ən şanlı və şərəfli dövrünü yaşayır. Bütün dünya Müstəqil Azərbaycanın gücünü, qüdrətini Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə rəşadətli Müzəffər Ordumuzun 44 gün ərzində işğal altındakı ərazilərimizin qaytarılması ilə nəticələnən Vətən müharibəsində aydın gördüyünü bildirdi. Bu tarixi zəfəri qazanan xalqımız bütün dünyaya nümayiş etdirdi ki, Azərbaycanın müstəqilliyi əbədi və dönməzdir.
Tədbirdə çıxış edən digər natiqlər Baş direktorun müavini Yaqub Ağasiyev, Baş direktorun istehsalat üzrə müavini – Texniki direktor Məzahir Hüseynov, İqtisadiyyat və uçot departamentinin rəisi Əli Bağış Azərbaycan Xalq Cümhuriyyətinin yaranması və müstəqilliyimiz haqqında geniş məlumatlar verdilər, cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti ilk dövrlərdə həyata keçirdiyi tədbirlər nəticəsində müstəqil dövlətçiliyimizin əsaslarının yaradılması və gələcək inkişaf yolunun müəyyən edilməsi baxımından mühüm əhəmiyyət kəsb etdiyini, 70 illik fasilədən sonra 1991-ci ildə SSRİ-nin süqutu və xalqımızın milli azadlıq hərəkatı nəticəsində yaranmış əlverişli tarixi bir şəraitdə Azərbaycan özünün dövlət müstəqilliyinin elan etdiyini və Xalq Cümhuriyyətinin varisi elan olunduğu haqqında ətraflı məlumat verdilər.