Ekoloji yönümlü layihələr və xidmətlər həyata keçirən “Ekol Mühəndislik Xidmətləri” QSC-də, hər il olduğu kimi 04.06.2022-ci il tarixində 5 iyun “Ümumdünya Ətraf Mühit Günü” münasibətilə “Təbiətlə harmoniyada davamlı yaşamaq” mövzusunda baş ofisdə toplantı keçirilmişdir. Keçirilən toplantıda QSC-nin Baş direktoru Ramil Əliyev “Ümumdünya Ətraf Mühit Günü”nün yaranma tarixi, əhəmiyyəti, ətraf mühitin qorunması və yaxşılaşdırılmasına yönələn işlər, dövlət və milli proqramların uğurlu nəticələri haqqında çıxış etmişdir.
Daha sonra çıxış edənlər Baş direktorun SƏTƏM üzrə müavini Eldəniz Həsənli, cəmiyyətin “Ekologiya” İdarəsinin müavini Əflatun Həsənov və Ekoloji monitorinq departamentinin rəis müavini Hafis Əbilov mövzu ətrafında çıxış edərək QSC-nin ətraf mühitin mühafizəsi sahəsindəki rolu, ətraf mühitin mühafizəsinə vətəndaş münasibəti, Respublikamızda ətraf mühitin mühafizəsi sahəsində görülən işlər, havanın çirklənməsinin cəmiyyət üçün zərərli olması, bəşəriyyətdə ətraf mühitin çirklənməsi və görülən tədbirlər haqqında məlumat verdilər. Eyni zamanda, Ətraf Mühitin mühafizəsi ilə əlaqədar nümayiş etdirilən video çarx iştirakçılar tərəfindən maraqla izlənmişdir.
Tədbirin davamı olaraq 5 iyun “Ümumdünya Ətraf Mühit Günü” münasibətilə 04.06.2022-ci il tarixində “Ekol Mühəndislik Xidmətləri” QSC-nin xidmət göstərdiyi bütün istehsalat sahələrinin yaşıllıq ərazilərində ənənəvi olaraq yaşıllaşdırma və abadlıq işləri yerinə yetirmək məqsədilə iməcilik keçirilmişdir. İməcilik zamanı istehsalat sahələri, inzibati binaların əraziləri alaq otlarından, eləcə də digər tullantılardan təmizlənmiş, ağacların dibləri boşaldılmış, yaşıllıqlara qulluq və abadlıq işləri yerinə yetirilmişdir.
Toplantının sonunda Cəmiyyətin bir qrup əməkdaşına ətraf mühitin mühafizəsi sahəsində səmərəli fəaliyyətinə görə Fəxri Fərman təltif olunmuşdur.