Təqdimetmə mərasimində “Ekol Mühəndislik Xidmətləri” QSC-nin rəhbərliyi, departament rəisləri və struktur bölmə rəhbərləri iştirak etmişlər.

QSC-nin Baş direktoru Ramil Əliyev mərasim iştirakçılarını salamlayaraq son illərdə “Ekol Mühəndislik Xidmətləri” QSC-nin əldə etdiyi uğurlardan, qazandığı nailiyyətlərdən, həyata keçirdiyi sosial-iqtisadi və ekoloji layihələrdən ətraflı danışdı.

Sonra Ramil Əliyev QSC-nin “Ekologiya” İdarəsinə təyin edilmiş rəis və rəis müavinini iştirakçılara təqdim edərək onların bacarıqlı bir rəhbər kimi formalaşdıqlarını, kollektiv arasında böyük nüfuza malik rəhbər kadr olduqlarını vurğulamış, yeni rəis və rəis müavinini təbrik edərək onlara gələcək fəaliyyətlərində uğurlar arzuladı.

Təqdimat mərasimində çıxış edənlər QSC-nin Baş direktoru Ramil Əliyevə ən düzgün seçim etdiyinə görə öz minnətdarlıqlarını bildirdilər. Əflatun Həsənovu və Sadiq Kərimovu təbrik edərək, onlara gələcək fəaliyyətlərində uğurlar dilədilər və daima onlara dəstək olacaqlarını bildirdilər. 

“Ekol Mühəndislik Xidmətləri” QSC-nin “Ekologiya” İdarəsinin rəisi Əflatun Həsənov və rəis müavini Sadiq Kərimov onlara göstərilən böyük etimada görə QSC-nin Baş direktoru Ramil Əliyevə və kollektivə öz minnətdarlıqlarını bildirdilər  və bu etimadı əməli fəaliyyətləri ilə doğruldacaqlarını təqdimat iştirakçılarının diqqətinə çatdırdılar.