2022-ci ilin fevral ayından başlayaraq “Ekologiya” İdarəsi tərəfindən “Azneft” İB-nin idarə və müəssisələrində KEM işləri həyata keçirilmiş, monitorinqin nəticəsi olaraq 25 ədəd KEM hesabatı hazırlanaraq “Azneft” İB-yə təqdim edilmişdir. Bununla yanaşı “Azneft” İB-nin dəniz neft-qaz yataqlarında neft-qaz əməliyyatları zamanı ətraf mühitə təsirlərin öyrənilməsi məqsədilə 10 yataq üzrə KEM keçirilmişdir. Keçirilmiş monitorinqlər zamanı toplanılmış məlumatlara və götürülmüş nümunələrin analiz nəticələrinə əsasən 6 yataq üzrə müvafiq hesabatlar hazırlanaraq “Azneft” İB-yə təqdim edilmiş və 4 yataq üzrə hesabatların hazırlanması davam etdirilir.
“Ekologiya” İdarəsi tərəfindən “Azneft” İB-nin sifarişinə əsasən neft qaz quyularının qazılması və digər tikinti layihə sənədləri üzrə ümumilikdə 11 ədəd Ətraf Mühitə Təsirin Qiymətləndirilməsi (ƏMTQ) sənədi işlənib hazırlanmış və Ekologiya və Təbii Sərvətlər Nazirliyindən (ETSN) müvafiq ekoloji ekspertiza rəyləri alınaraq “Azneft” İB-yə təqdim edilmişdir. Hal hazırda 2 ədəd ƏMTQ sənədinin hazırlanması işləri davam etdirilir. Bunlarla yanaşı “Azneft” İB-nin idarə və müəssisələri üçün Azərbaycan Respublikasının ekoloji qanunvericiliyi ilə tənzimlənən 5 ədəd ekoloji-normativ və texniki sənəd tərəfimizdən hazırlanmış və həmin sənədlər ETSN-nin müvafiq qurumlarında razılaşdırılaraq sifarişçiyə təqdim edilmişdir.
“Azneft” İB-nin 1 və 2 saylı İxtisaslaşdırılmış Neft-Mədən Xüsusi Texnika İdarəsinin balansında olan nəqliyyat vasitələrinin ekoloji müayinəsi həyata keçirilmişdir.
Eyni zamanda Birliyin istehsalat sahələrində yaşıllıqlara aqrotexniki qulluq üzrə məsləhət xidmətləri aparılmış və 18 ədəd hesabat hazırlanaraq sifarişçiyə təqdim edilmişdir.
2022-ci ilin iş planına uyğun olaraq “Azneft” İB-nin 5 müəssisəsində ekoloji maarifləndirmə işləri aparılmış və bu sahədə işlər digər müəssisələrində də davam etdirilir.