18 oktyabr 2022-ci il Azərbaycan Respublikası Dövlət Müstəqilliyinin Bərpasının 31-ci ildönümüdür. Bu tarixi hadisə münasibəti ilə QSC-nin kollektivi Azərbaycan xalqını təbrik edir, onlara can sağlığı, müstəqilliyimizin daha da möhkəmləndirilməsi və əbədi yaşaması naminə uğurlar arzulayır.
1991-ci il oktyabrın 18-də "Azərbaycan Respublikasının dövlət müstəqilliyi haqqında" Konstitusiya Aktı qəbul olunub. Konstitusiya Aktında 1918-ci il 28 may tarixli İstiqlal Bəyannaməsinə və "Azərbaycan Respublikasının dövlət müstəqilliyini bərpa etmək haqqında" Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad edilərək, Azərbaycan Respublikasının Azərbaycan Xalq Cümhuriyyətinin varisi olduğu təsbit edildi. Beləliklə, "Azərbaycan Respublikasının dövlət müstəqilliyi haqqında" Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa etdi.
Belə bir tarixi şəraitdə, 1993-cü ilin iyununda xalqın təkid və tələbi ilə hakimiyyətə gələn Ümummilli Lider Heydər Əliyev özü ilə bərabər Azərbaycana siyasi müdriklik gətirdi. Məhz Ümummilli Liderin zəngin siyasi təcrübəsi, yüksək idarəçilik bacarığı, Vətənə olan tükənməz sevgisi Azərbaycanın dövlət müstəqilliyinin bərpasını təhlükədən qurtardı. Ümummilli Lider Heydər Əliyev “Müstəqilliyi qorumaq onu əldə etməkdən qat-qat çətindir” fikri ilə nəhəng dövlət quruculuğu bərpası işlərinə başladı. Ümummilli Lider Heydər Əliyev qarşıya çıxan bütün çətinlikləri qısa vaxt ərzində dəf etməklə Azərbaycanın səsinin ən nüfuzlu beynəlxalq təşkilatların kürsüsündən eşidilməsinə nail oldu.
2022-ci il oktyabrın 18-də Azərbaycan Respublikasının Müstəqilliyinin Bərpa edilməsinin 31 ili tamam olur. Azərbaycan xalqı 1991-ci ildən sonra ilk dəfə bu bayramı tam fərqli olaraq, öz ərazi bütövlüyünü bərpa etmiş qalib xalq kimi qeyd edir.
Dövlət Müstəqilliyimizin Bərpa olunmasında müstəsna rolu olmuş Ümummilli Lider Heydər Əliyevin siyasi kursu ötən illərdə və hal hazırda uğurla davam etdirilir. Azərbaycan Respublikasının Prezidenti cənab İlham Əliyevin apardığı uğurlu siyasət nəticəsində keçən 31 ildə ölkəmiz öz müstəqilliyinin bərpasını bütün dünyada tanıtmış, beynəlxalq təşkilatların üzvlüyünə qəbul edilmiş, dünya dövlətləri ilə bərabər hüquqlu əlaqələr yaratmışdır. Bu illərdə daxili və xarici qüvvələrin təxribat və maneələrinə baxmayaraq, Dövlət Müstəqilliyimizin Bərpa edilməsi qətiyyətlə qorunmuş və onun yaşaması üçün vacib olan bütün tədbirlər görülmüşdür.
Azərbaycanın Dövlət Müstəqilliyinin Bərpası xalqımızın tarixi nailiyyətidir. Hər birimizin müqəddəs borcu müstəqil dövlətimizin qədrini bilmək, onu qorumaq, inkişaf etdirmək, dünyanın ən inkişaf etmiş ölkələri səviyyəsinə çatdırmaq və bu mübarizədə daha möhkəm əzm, qətiyyət nümayiş etdirməkdən ibarətdir.