Əvvəlcə “Ekol Mühəndislik Xidmətləri” QSC-nin rəhbərliyi SOCAR-ın rəhbər heyəti və çoxminli kollektivi ilə birlikdə anım mərasimində iştirak edərək Ümummilli Lider Heydər Əliyevin Fəxri Xiyabandakı abidəsi önünə tər çiçəklər düzmüş və onun əziz xatirəsini yad etmişlər.
Anım tədbiri “Ekol Mühəndislik Xidmətləri” QSC-nin Baş ofisində davam etdirilmişdir.
Tədbirdə “Ekol Mühəndislik Xidmətləri” QSC-nin rəhbər heyəti, departament və şöbə rəisləri, kollektiv üzvləri iştirak etmişlər. İlk öncə Azərbaycan Respublikasının himni səsləndi. Daha sonra Ümummilli Lider Heydər Əliyevin, Vətən uğrunda canlarından keçən bütün şəhidlərimizin əziz xatirəsi bir dəqiqəlik sükutla yad edildi.
Ümummilli Lider Heydər Əliyevin vəfatının 19-cu ildönümü ilə əlaqədar dövlət qurumları, siyasi partiyalar, qeyri - hökumət təşkilatları, ictimaiyyətin nümayəndələri Ulu öndərin Fəxri Xiyabandakı məzarını ziyarət edir və anım tədbirləri keçirirlər.
Tədbirdə çıxış edən “Ekol Mühəndislik Xidmətləri” QSC-nin Baş direktoru Ramil Əliyev müasir müstəqil Azərbaycan dövlətinin memarı və qurucusu, dahi siyasətçi, böyük şəxsiyyət Ümummilli Lider Heydər Əliyevin Vətən qarşısında xidmətlərinin danılmaz olduğunu bildirdi.
Daha sonra Ramil Əliyev çıxışını davam etdirərək Ümummilli Lider Heydər Əliyevin müasir Azərbaycan dövlətinin qurucusu, müstəqil dövlətin Konstitusiyasının qəbul olunmasında, Azərbaycan milli bayrağı – Azərbaycan Xalq Cümhuriyyətinin üçrəngli bayrağı dövlət bayrağı kimi elan edilməsində böyük rolu olduğunu vurğuladı.
Toplantıda çıxış edənlər “Ekol Mühəndislik Xidmətləri” QSC-nin “Ekologiya” İdarəsinin rəisi Əflatun Həsənov, Tullantıların emalı departamentinin rəisi Zeynal Babayev, Torpaqların rekultivasiyası departamentinin rəisi Məhəmmədəli Həsənov və Kadrlar şöbəsinin rəisi Sədaqət Söhbətova Heydər Əliyevin həyat və fəaliyyətinin əsas məqamlarından, eləcə də onun xalq və dövlət qarşısındakı danılmaz xidmətlərindən danışdılar.
Çıxış edənlər inamla bildirdilər ki, dünya miqyasında müstəqil Azərbaycandan danışanda həmişə onun qurucusu Heydər Əliyev anılır və adı uca tutulur.
Qeyd olunmuşdur ki, Ümummilli Liderin şah əsəri olan Azərbaycan bu gün Heydər Əliyevin ideyaları altında dinamik inkişaf yolu ilə gedir. Ulu öndərin layiqli davamçısı, möhtərəm Prezidentimiz cənab İlham Əliyevin yürütdüyü məqsədyönlü siyasət nəticəsində respublikamızda milli iqtisadiyyatımızın və qeyri neft sektorunun inkişafı üçün əlverişli şərait yaradılmışdır.
Toplantıda Heydər Əliyevin həyat və fəaliyyətini əks etdirən video çarx nümayiş olunmuş, və xatirəsi əziz tutulmuşdur.
Odur ki, Ümummilli Lider Heydər Əliyev Azərbaycan xalqının qəlbində əbədi yaşayacaqdır.