Tədbirdə çıxış edən  QSC-nin Baş direktoru Ramil Əliyev Vətənimizin azadlığı uğrunda canlarını qurban vermiş şəhidlərimizin və faciə qurbanlarının əziz xatirəsini  bir dəqiqəlik sükutla yad edilməsini təklif etdi və Xocalı soyqırımı xalqımızın  böyük dərdi, kədəri olmaqla yanaşı, eyni zamanda Azərbaycan xalqının  qan yaddaşında öz milli azadlığı uğrunda  keçdiyi şərəfli mübarizə yolu kimi qalacağını bildirdi.

     Daha sonra Ramil Əliyev çıxışını davam etdirərək bildirdi ki,  1992-ci il fevralın 25-dən 26-na keçən gecə  erməni cəlladları Xankəndində yerləşən 366-cı alayın  yaxından köməkliyi ilə Xocalı şəhərini tamamilə yandırdılar. Şəhəri işğal etmiş erməni təcavüzkarları 613 dinc  sakini, o cümlədən  106  qadını, 63 uşağı və 70 ahıl insanı amansızlıqla, 56 nəfəri xüsusi qəddarlıqla  qətlə yetirmiş,  1275 nəfəri əsr götürmüş, 8 ailəni isə tamamilə məhv etmişlər. Bu bəşər tarixində törədilən ən ağır cinayətlərdən biridir.

Ramil Əliyev çıxışında vurğuladı ki, Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır.

Daha sonra o bildirdi ki, Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci il mayın 8-dən başlayan "Xocalıya ədalət" beynəlxalq kampaniyası çərçivəsində dövlət qurumları, gənclər təşkilatları və ali təhsil müəssisələrində Xocalı soyqırımına həsr olunan təqdimatlar təşkil edilir.

Tədbirdə İqtisadiyyat və Uçot departamentinin rəisi Əli Bağış, QSC-nin “Ekologiya” İdarəsinin rəisi Əflatun Həsənov öz çıxışlarında Xocalı soyqırımının Ermənistanın Qarabağı  işğal etmək məqsədi ilə apardığı işğalçılıq  müharibəsinin gedişində dinc azərbaycanlı əhaliyə qarşı törətdiyi soyqırımı cinayətlərinin  miqyasına görə ən dəhşətlisi olduğunu bildirdilər. 

Tədbirin davamı olaraq SOCAR-ın rəhbərliyi çoxminli kollektivi ilə birlikdə “Ekol Mühəndislik Xidmətləri” QSC-nin rəhbərliyi və kollektivi soyqırımın 31-ci ildönümü ilə əlaqədar fevralın 25-də Xocalı soyqırımı abidəsini ziyarət etmiş, soyqırım qurbanlarının xatirəsi böyük ehtiramla yad edilərək, abidənin önünə qərənfillər düzmüşlər.

“Xocalı soyqırımı öz miqyasına görə Xatın və Sonqmi faciələri ilə bir sırada dayanır. Bu təkcə Azərbaycan xalqına qarşı deyil, bütün insanlıq və bəşəriyyət əleyhinə yönəlmiş ən ağır cinayətlərdən biridir” deyən Ümummilli Lider Heydər Əliyevin təşəbbüsü ilə 1994-cü ilin fevralın 24-də Milli Məclis “Xocalı Soyqırımı Günü” haqqında qərar qəbul etdi və BMT-dən, dünya dövlətlərindən bu qətliamın gerçək mahiyyətini açıqlayaraq beynəlxalq ictimaiyyətin erməni terrorizminə qarşı təsirli tədbirlər görülməsini tələb etdi.

Nəticə olaraq Azərbaycanın haqlı mövqeyini bütün dünyaya daha gur səslə nümayiş etdirən Müzəffər Ali Baş Komandan, Azərbaycan Respublikasının Prezidenti Cənab İlham Əliyevin, Milli Ordumuzun və Azərbaycan xalqının birliyi nəticəsində 27 Sentyabr 2020-ci ildə əks hücuma keçən  “Dəmir Yumruq” əməliyyatı  nəticəsində Zəfər çalaraq, işğalda olan bütün ərazilərimiz  erməni işğalçılarından azad edildi. Bu isə ürəkləri daima Vətən eşqi ilə döyünən Xocalı Şəhidlərinin müqəddəs ruhuna hörmət və ehtiramlarının bariz nümunəsidir.

26 fevral Xocalı soyqırımı anım günü münasibətilə QSC-nin baş ofisində və xidmət sahələrində faciəni əks etdirən stendlər təşkil edilmişdir.