“Azərbaycan Respublikasında 2023-cü ilin “Heydər Əliyev İli” elan edilməsi haqqında” Sərəncamın 2-ci bəndinin icrasını təmin etmək məqsədilə “Ekol Mühəndislik Xidmətləri” QSC tərəfindən müvafiq tədbirlər planı hazırlanıb həyata keçirilir.
Bu tədbirlərdən biri də xeyriyyə tədbiridir. “Ekol Mühəndislik Xidmətləri” QSC-nin Baş direktorun müavini Yaqub Ağasiyev, Baş direktorun Ümumi işlər üzrə müavini İsrafil Əliyev, Həmkarlar İttifaqı Komitəsinin sədri Əli Ələkbərov, İctimai sosial şöbənin rəis müavini Məzahir İskəndərov və cəmiyyətin əməkdaşları Suraxanı rayonu Yeni Günəşli qəsəbəsində yerləşən 2 saylı uşaq evində oldular. Qonaqları uşaq evinin direktoru Sevda Hacıyeva qarşıladı. Fəaliyyətləri barədə geniş məlumat verən Sevda Hacıyeva, qonaqları uşaq evindəki şəraitlə yaxından tanış etdi. Görüş əsnasında “Ekol Mühəndislik Xidmətləri” QSC-nin Baş direktorun müavini Yaqub Ağasiyev tədbir iştirakçılarına valideyn himayəsindən məhrum olmuş uşaqlara dövlətin göstərdiyi qayğıya görə möhtərəm Prezidentimiz İlham Əliyev cənablarına və Vitse-Prezident, Heydər Əliyev Fondunun Prezidenti, İSESKO-nun xoşməramlı səfiri Mehriban xanım Əliyevaya öz dərin minnətdarlığını bildirdi.
Görüş iştirakçıları 2 saylı uşaq evinin rəhbərliyinin və müəllim heyətinin uşaqlara göstərdiyi qayğıdan razı qaldıqlarını bildirərək, şagirdlərə onlara göstərilən qayğı və etimadı doğrultmağı, təhsildə, idmanda və sənətdə uğurlar qazanmağı, Vətənimiz üçün layiqli övladlar kimi yetişmələrini arzulamışlar.
Sevda Hacıyeva uşaqlara göstərdiyi diqqət və qayğıya görə qonaqlara öz minnətdarlığını bildirmiş, belə görüşlərin uşaqlara mənəvi tərbiyəsində böyük rol oynadığını xüsusilə vurğulamışdır.
Tədbirin sonunda cəmiyyət tərəfindən gətirilən hədiyyələr 2 saylı uşaq evinə təqdim edildi.