“Azərbaycan Respublikasında 2023-cü ilin “Heydər Əliyev İli” elan edilməsi haqqında” Sərəncamın 2-ci bəndinin icrasını təmin etmək məqsədilə “Ekol Mühəndislik Xidmətləri” QSC-nin dəstəyi və Azərbaycan Fotoqraflar Birliyinin tədbirlər planına uyğun olaraq dəniz sahilində təmizlik aksiyası keçirilmişdir.
29.04.2023-cü il tarixində “Ekol Mühəndislik Xidmətləri” QSC-nin dəstəyi və əməkdaşlarının, Azərbaycan Fotoqraflar Birliyinin və fotosevərlərin, Azərbaycan Memarlıq və İnşaat Universitetinin müəllim və tələbə heyətinin, Milli Abşeron Qoruğunun könüllülərinin iştirakı ilə Ümummilli Lider Heydər Əliyevin anadan olmasının 100 illiyinə həsr olunmuş dəniz sahilinin məişət tullantılarından təmizləmək aksiyası keçirilmişdir.
Aksiyanın keçirilməsində əsas məqsəd Xəzər dənizində son illər baş verən təbii proseslərdə dəniz sahilində suyun çəkilməsi ilə əlaqədar yaranan vəziyyətlə bağlı tədbirlərə qoşulmaq və ictimaiyyətin fikrini bu tipli aksiyalara cəlb etməkdən ibarət olmuşdur.
Aksiya zamanı təyin olunmuş Abşeron Milli Parkının Şah Dili Qoruğu sahil zolağında “Təbiətə bir gün” devizi altında məişət tullantılarından, plastik və dəmir qablardan təmizləmə işləri aparılmış, toplanmış tullantılar tullantı məntəqəsinə təhvil verilmişdir.
Tədbirin sonunda çay süfrəsində aksiya iştirakçıları ilə gələcəkdə də bu cür ekoloji yönümlü layihələrin həyata keçirilməsi haqqında söhbətlər aparılmışdır.