Növbəti keçirilən tədbirlərdən biri də 08.05.2023-cü il tarixində QSC-nin Eko Park İnnovasiya Mərkəzində Elm və Təhsil Nazirliyinin 160 saylı Klassik Gimnaziyasının valideyn, şagird və müəllim heyəti üçün ekskursiya təşkil edilmişdir. 

Tədbirdə “Ekol Mühəndislik Xidmətləri” QSC-nin rəhbər heyəti, əməkdaşları və 160 saylı gimnaziyasının valideyn, şagird və müəllim heyəti iştirak etmişlər. 

Ekskursiyanın təşkilində əsas məqsəd ölkəmizin gənc nəsil nümayəndələrinin diqqətini Azərbaycanın ekoloji tarazlığının qorunmasına və bərpasına, ekoloji biliklərin artırılmasına, eyni zamanda bu sahədə bacarıqlarının formalaşmasına yönəltməkdən ibarət olmuşdur.

Proqramın açılışı zamanı Eko Park İnnovasiya Mərkəzinin akt zalında gimnaziyanın valideyn, şagird və müəllim heyəti ilə görüş keçirilmişdir. Görüş zamanı “Ekol Mühəndislik Xidmətləri” QSC-nin Baş direktorun müavini Yaqub Ağasiyev çıxış etmişdir. O, tədbir iştirakçılarını salamladı və çıxışını davam etdirərək həyatını xalqına həsr etmiş Ümummilli Lider Heydər Əliyevin müstəqilliyimizin əldə edilməsində, suverenliyimizin qorunub saxlanılmasında, respublikamızın iqtisadi qüdrətinin yüksəldilməsi istiqamətində gördüyü işlərdən və onun həyatımızın bütün sahələrindəki fəaliyyətindən danışdı. Xüsusilə vurğuladı ki, Heydər Əliyevin  siyasi fəaliyyətinin əsas missiyası  Azərbaycanı  düşdüyü  bəlalardan xilas etmək olub. Yalnız onun  dərin zəkası Azərbaycanı bir dövlət kimi məhv olmaqdan  xilas etdiyini bildirdi.

Tədbirin davamı olaraq çıxış üçün söz İctimai sosial şöbənin rəisi və Həmkarlar İttifaqı Komitəsinin sədri Əli Ələkbərova verildi. O,  suveren Azərbaycan dövlətinin  qurucusu və memarı, fenomen şəxsiyyət  Heydər  Əliyevin  həyat və fəaliyyətindən  ətraflı danışaraq Azərbaycan  tarixində xalqımızın birləşməsi, dövlətçiliyimizin möhkəmləndirilməsi, ərazi toxunulmazlığımızın təmin edilməsi,  insanların rifahının yaxşılaşması uğrunda ardıcıl, məqsədyönlü mübarizə aparan  və uğurlu, dayanaqlı nəticələrə nail olan, Azərbaycanının milli qürurunu özünə qaytaran, dövlətimizi öz  tükənməz  sərvətinin  sahibi edən  ən müdrik  və ən  cəsarətli rəhbər Ümummilli Liderimiz Heydər Əliyev olduğunu bildirdi.

Tədbir 160 saylı Klassik Gimnaziya şagirdlərinin çıxışları və ədəbi-bədii kompozisiyaları ilə davam etdi.

Tədbirin davamı olaraq Mərkəzin ərazisində ağacəkmə aksiyası keçirilmişdir.

Daha sonra Eko Park İnnovasiya Mərkəzin rəisi Tahir Şıxəliyev valideyn, şagird və müəllim heyətinə Mərkəz haqqında geniş məlumat vermiş, ekskursiya və maarifləndirmə proqramı keçmişdir.

Ekskursiya zamanı qonaqlar park ərazisində olan alternativ enerji mənbələri, Enerji İdarəetmə Mərkəzi, fidanlıq sahəsi və istixana ilə tanış olmuşlar.