Növbəti keçirilən tədbirlərdən biri də 23.05.2023-cü il tarixində QSC-nin Eko Park İnnovasiya Mərkəzində Heydər Əliyev adına Müasir Təhsil Kompleksinin şagird-müəllim heyəti üçün təşkil edilmiş ekoloji maarifləndirmə tədbiri idi. 

Tədbirdə SOCAR vitse-prezidenti Rəfiqə Hüseynzadə, vitse-prezidentin müavini Rövşən Fətullayev, SOCAR prezidentinin müşaviri Aygün Hüseynova, SOCAR İctimaiyyətlə Əlaqələr və Kommunikasiya Xidmətinin əməkdaşları, “Ekol Mühəndislik Xidmətləri” QSC-nin Baş direktoru Ramil Əliyev, əməkdaşları və Heydər Əliyev adına Müasir Təhsil Kompleksinin şagird-müəllim heyəti iştirak etmişlər. 

Ekoloji maarifləndirmə tədbirinin əsas mövzu “Heydər Əliyev və Azərbaycanın yeni neft strategiyası” olmaqla ölkəmizin gənc nəsil nümayəndələrinin diqqətini Azərbaycanın ekoloji tarazlığının qorunmasına və bərpasına, ekoloji biliklərin artırılmasına, eyni zamanda bu sahədə bacarıqlarının formalaşmasına yönəltməkdən ibarət olmuşdur.

Tədbir öncəsi Eko Park İnnovasiya Mərkəzin rəisi Tahir Şıxəliyev tədbir iştirakçılarını salamladı və Mərkəz haqqında ətraflı məlumat verdi.

Tədbirin açılışı zamanı Eko Park İnnovasiya Mərkəzinin akt zalında Kompleksin şagird və müəllim heyəti ilə görüş keçirilmişdir. Görüş zamanı SOCAR vitse-prezidenti Rəfiqə Hüseynzadə çıxış etmişdir. O, tədbir iştirakçılarını salamladı və çıxışını davam etdirərək həyatını xalqına həsr etmiş Ümummilli Lider Heydər Əliyevin müstəqilliyimizin əldə edilməsində, suverenliyimizin qorunub saxlanılmasında, respublikamızın iqtisadi qüdrətinin yüksəldilməsi istiqamətində gördüyü işlərdən və onun həyatımızın bütün sahələrindəki fəaliyyətindən danışdı. Xüsusilə vurğuladı ki, Heydər Əliyevin  siyasi fəaliyyətinin əsas missiyası  Azərbaycanı  düşdüyü  bəlalardan qorumaq və onun neft strategiyasını inkişaf etdirməkdən ibarət olub. Yalnız onun  dərin zəkası Azərbaycanı bir dövlət kimi məhv olmaqdan  xilas etdiyini bildirdi.

Sonra tədbir Heydər Əliyev adına Müasir Təhsil Kompleksinin şagird-müəllim heyətinin çıxışları ilə davam etdi və SOCAR əməkdaşları tərəfindən onlara hədiyyələr təqdim edildi.

Tədbir zamanı Mərkəzin ərazisində yerləşən qapalı istixanada körpə fidanların əkilməsi Ümummilli Lider Heydər Əliyevin əziz xatirəsinə ehtiramla, rəmzi olaraq körpə fidanların dibçəklərə köçürülməsi, fidanları əkən hər bir şagirdin adı dibçəyin üzərində yazıldı və dibçəklər şagirdlərə hədiyyə edildi.

Daha sonra Eko Park İnnovasiya Mərkəzinin rəis müavini  Emil Avazov qonaqlar, şagird və müəllim heyətinə Mərkəz və ekoloji maarifləndirmə proqramı haqqında məlumat vermişdir.

Qonaqlar park ərazisində olan alternativ enerji mənbələri, Enerji İdarəetmə Mərkəzi, fidanlıq sahəsi və istixana ilə tanış olmuşlar.

Tədbirin sonunda çay süfrəsi təşkil edilmiş və maraqlı söhbətlər aparılmışdır.