Sərginin açılış mərasimində Azərbaycan Respublikasının Prezidenti cənab İlham Əliyev, dövlət rəsmiləri və şirkət rəhbərləri iştirak etmişlər. Bu da sərginin statusunun yüksək olmasını bir daha sübut edir.
31 may – 2 iyun 2023-cü il tarixində Bakı Ekspo Mərkəzində keçirilən “Xəzər Neft və Qaz” sərgisinin əsas məqsədi “Bakı Enerji Həftəsi”nin tədbirləri çərçivəsində ənənəvi olaraq ikitərəfli Biznes Görüşlərinin keçirilməsi, aktual mövzular keçiriləcək sessiyalar, “Neft və Qaz sənayesində avtomatlaşdırma üzrə qabaqcıl həllər”, neft, qaz və energetika sahəsinin aparıcı şirkətləri tərəfindən neft və qaz avadanlıqları, neft-qaz yataqlarının işlənməsi xidmətləri, enerji daşıyıcılarının nəqli, neft və qazın saxlanması üçün anbar sistemləri, neft-kimya məhsulları, texniki xidmət, təhlükəsizlik sahələrində innovativ texnologiyalar və s. məhsul və xidmətlər nümayiş olunacaq. Həmçinin iştirakçı şirkətlərin təqdimatları keçiriləcək.
“Xəzər Neft və Qaz” sərgisi və Konfransına Azərbaycan Respublikası Energetika Nazirliyinin, Azərbaycan Respublikası Dövlət Neft Şirkətinin (SOCAR) rəsmi dəstəyi olmaqla, “İteca Caspian” MMC və İTECA Caspian LLC və İCA Eventas şirkətlərinin təşkilatçılığı ilə keçirilən sərgidə dünyanın 25-dən çox ölkəsini təmsil edən şirkət, yerli və xarici mütəxəssislər qatılmışlar.
Builki “Bakı Enerji Həftəsi” daha dayanıqlı, təhlükəsiz enerji güclərinin yaradılması, yeni əməkdaşlıq üçün qlobal enerji bazarının və beynəlxalq şirkətlərinin bir araya gəlməsi, qlobal çağırışa çevrilmiş dekarbonlaşma, “yaşıl enerji” növlərinin artırılması, “Naxçıvan və Şərqi Zəngəzurun yaşıl enerji potensialı” konsepsiyasının yaradılması imkanları vəd edir.
3 iyun tarixində Bakı Enerji Həftəsinin “Naxçıvan və Şərqi Zəngəzurun yaşıl enerji potensialı” adlı – xüsusi sessiyası bu il Azərbaycanın Naxçıvan şəhərində baş tutacaq.
Bu forumda dünyanın 20 ölkəsindən 400-dən çox nümayəndə iştirak edəcək. Forumun gündəliyinə “Keçid dövründə yeni enerji şərtləri”, “Qlobal enerji perspektivləri”, “Xəzər regionunun bərpa olunan enerji potensialı”, “Enerji sektorunda dördüncü sənaye inqilabı”, “Enerji böhranı dövründə qaz təchizatının rolu” və s. kimi mövzular daxil edilib.
“Ekol Mühəndislik Xidmətləri” QSC yüksək statusa malik 28-ci ilini qeyd etdiyimiz “Xəzər Neft və Qaz” sərgisində maraqlı stendi ilə iştirak edir. QSC-nin fəaliyyət sahələrini, həyata keçirdiyi ekoloji layihələrin və sosial sahəni əks etdirən stend, elektron məlumatlar və əyani materiallar sərgi iştirakçıları tərəfindən böyük maraqla izlənilir.
Təşkilatçılar və iştirakçılar əmindirlər ki, 28 illik bir dövrü arxada qoymuş bu sərgi regionun neft sektorunda əldə olunan nailiyyətlərin, habelə işgüzar əlaqələr və qarşılıqlı əməkdaşlıq üçün yeni perspektivlər yaradan platforma olaraq qalacaq.